Annina

by Gian Fadri Caderas

[ 60 ]

Annina.

M'haun dit, cha fras-cha rösa
Ais bella, zarta flur;
Cha'l sguard dad ogni matta
Straglüscha be d'amur.

M'haun dit, cha'l mer posseda
Immensa vastited,
Cha'l firmamaint ho asters
D'divina majested.

[ 61 ]

M'haun dit, cha d'sair' ün vezza
La glüna s'inoltrer,
Nel cler azur regina
E tuot inargenter.

M'haun dit cha'l di splendura
In tschel ün aster d'or;
Il muond, il muond stu esser
Coruna da tesor!

Mo mer, solagl e terra
Ün vel' per me zoppet;
Per me ais tuot s-chürdüna
Dal di cha vit' avet!

M'haun dit, ch'a bgers ün legia
Sül leiv ün fos sorrir;
M'haun dit, cha bgers chi rian
Nel cour haun be martir!

Scha fluors nun vez, ögliedas,
Chi faun palais amur,
Nun vez neir quels chi rian
Ed haun in cour dolur.

[ 62 ]

Scha'l mer nun vez, las stailas
Neir vez del fos il sguard!
Scha orva ais Annina,
Sieu cour ais pür e zart.

15 Avrlgl 1867.