Biblia/Vetule Testamento/Isaia/Isaia 23

Isaia

23

Le Senior va condemnar Tyro

¹Ecce un oraculo concernente Tyro: “Lamenta vos, grande naves^[1], quia le porto^[2] de Tyro es tro devastate pro entrar in illo! Le rumores que vos audiva in Cypro es ver. ²Lamenta vos^[3] populos del costa e mercantes de Sidon, que percurre le mares, ³navigante super aquas profunde! Illes vos portava grano del Egypto e recoltas de longe le Nilo. Vos esseva le mercato del mundo.

⁴Erubesce, oh Sidon, proque il es le mar a dicer isto, oh fortalessa del mar: “Io non parturiva e non generava filios. Io non nutriva juvene homines, ni io educava juvene feminas^[4]”. ⁵Quando le nova pervenira a in Egypto, illes essera conturbate in audir re lo que eveniva a Tyro. ⁶Face lo saper a Tharsis! Lamenta vos, oh abitantes del costa. ⁷Es isto vermente le citate que tanto se gloriava, cuje origines se trova in le antiquitate? Pensa a tote le colonos que tu mandava in placias lontan^[5]!

⁸Qui cogitava de facer incider isto a le coronate Tyro, cuje mercantes esseva como princes, e cuje commerciantes esseva inter lew plus nobile dignitarios del terra? ⁹Il esseva le Senior del universo a cogitar isto! Il esseva ille a dishonorar le superbia que proveniva de tote su beltate, a humiliar tote le dignitarios del terra. ¹⁰Populo^[6] de Tharsis, retorna a cultivar tu terra, como on face quando on transi le Nilo; a Tyro il non ha plus alicun mercato. ¹¹Le Senior extendeva su mano super le mar; ille soccuteva regnos; ille dava le ordine de destruer le fortalessa de Canaan. ¹²Ille diceva: “Tu non te allegrara plus. oh violate virgine, filia de Sidon! Leva te e fugi a in Cypro, ma non mesmo ibi tu non va trovar ulle quiete”.

¹³Ecce le terra del Chaldeos^[7], ille nation que perdeva su identitate! Le Assyros lo rendeva un habitation pro animales salvage. Illes erigeva ibi contra su muralias lor turres de assedio; demoliva su fortalessas, e los faceva devenir un cumulo de ruinas. ¹⁴Lamenta vos, grande naves, quia tu porto esseva destruite!

¹⁵In ille tempore Tyro essera oblidate per 70 annos, sicut le expectation de vita de un rege^[8]. Post septanta annos, Tyro essayara de novo attraher le attention del mundo, como le meretrice del canto popular: ¹⁶“Prende le harpa, vade per le citate, meretrice oblidate. Sona lo ben. Sona multe cantos, assi tu essera memorate!”. ¹⁷Al termino de septanta annos, le Senior reviviscera Tyro. Illa recomenciara ganiar moneta per vender su servicios^[9] a tote le regnos del mundo. ¹⁸Finalmente su profitos e su ganios essera consecrate al Senior. Su ricchessas non essera accumulate o thesaurisate, proque su profitos essera date a illes que vive coram le Senior^[10] e essera empleate pro emer grande quantitate de nutrimentos e splendide vestes.

Notas

1. Litt. “naves de Tharsis”. Iste expression significa “naves fabricate in Tharsis”, o “naves que pote vader usque al lontan Tharsis”.
2. Litt. “vostre refugio”.
3. On poterea adder hic “a basse voce”.
4. O “virgines”.
5. Litt. “!e cuje pedes lo conduceva a resider in terras lontan”.
6. O “filia”.
7. O “del Babyloneses”
8. Litt. “sicut le dies de un rege”.
9. O “a prostituer se”.
10. Le sacerdotes.