Jeremia

30

Promissas de liberation

¹Le Senior parlava de novo a Jeremia. Ille le diceva: ²“Isto es lo que le Senior, le Deo de Israel, dice: ‘Scribe in un rolo omne parolas que io es sur le puncto de dicer te. ³Ecce, le tempore veni in le qual io revertera le sorte de mi populo, Israel e Judah’, dice le Senior. “Io les facera retornar a in le terra que io habeva date a lor ancestres, e illes lo habera itero in possession’”.

⁴Assi, ecce lo que le Senior dice re Israel e Judah. ⁵Si, ecce lo que ille dice: “Vos audi critos de panico; il ha terror e nulle pace. ⁶Demanda vos isto e considera lo attentivemente: Esque vos unquam videva un homine parturir un infante? Quare, ergo, io vide tote iste homines forte sasir lor lumbos dolente quasi sicut un femina parturiente? E quare lor facies ha un tal pallor mortal? ⁷Guai! Que terribile tempore de tribulation es isto pro le descendentes de Jacob. Tamen, ex tote isto illes essera salvate. ⁸Quia in ille die,” dice le Senior del universo, “Io frangera le jugo de lor collo e rumpera lor catenas. Estranieros non essera plus lor patrones, ⁹sed illes servira le Senior lor Deo e lor rege descendente de David - le rege que io suscitara pro illes. ¹⁰Ergo non time, Jacob, mi servitor; non sia consternate, Israel,” dice le Senior. “Quia io facera de novo retornar a domo vos e vostre descendentes ab le paises lontan ubi vos es nunc in captivitate. Le descendentes de Jacob retornara a lor terra e gaudera le pace. Ibi illes vivera in securitate e nemo plus les terrera. ¹¹Quia io, le Senior, declara que io es con te e te salvara. Io completemente destruera tote le nationes in le quales io te dispergeva. Ma io non te destruera completemente. Mi judicio te castigara, ma solmente in debite juste mensura. Io non permittera que tu vade del toto impunite”.

¹²In ultra, le Senior dice al populo de Sion: “Tu vulneres es insanabile, tu plagas es grave. ¹³Il ha nemo qui plaita tu causa. Il ha nulle remedios pro tu ulceras. Il ha nulle curation pro te. ¹⁴Tote tu amantes - tu alliatos - te oblidava e non te quere plus. Quia io te attaccava como haberea facite un inimico. Io te castigava cruelmente propter le multitude de tu iniquitates e tu grande culpas. ¹⁵Quare tu te plange de tu vulneres, que tu dolor is insanabile? Io debeva punir te propter le multitude de tu iniquitates e propter tu grande culpas. ¹⁶Ma omnes qui destrueva te essera destruite. Tote tu inimicos essera ducite in captivitate e qui te devastava essera devastate. Tu predatores devenira predas a lor vice. ¹⁷Si, io restablira tu sanitate, io sanara tu vulneres. Io, le Senior, lo declara! Quia tu esseva appellate un ejection, Sion: le citate del qual nemo se occupa”.

¹⁸Le Senior dice: “Io restaurara le domos ruinate del descendentes de Jacob. Io miserara lor tectos ruinate. Omne urbes essera reconstruite sur lor ruinas anterior. Omne habitationes fortificate occupara de novo le loco in le qual illos un vice esseva fundate. ¹⁹Ex ille placias vos audira de novo cantos de regratiamento, e le sono de risadas e de gaudio. Io les multiplicara e non les diminuera. Io les dara honor e non plus illes essera dispreciate. ²⁰Le descendentes de Jacob gaudera itero de lor privilegios anterior. Lor communitate essera restablite in mi favor, e io punira omnes qui essaya causar les tribulationes. ²¹Un de lor proprie populo essera lor principe. Lor rector venira del lor proprie numero. Io le invitara acceder ad me, e ille lo facera. Quia nemo hardira venir sin esser invitate! Io, le Senior, lo declara. ²²Tunc vos essera de novo mi populo e io essera vostre Deo. ²³Reguarda! Le ira del Senior venira sicut un tempesta. Sicut un tempesta illo descendera furiose sur le capite del impios. ²⁴Le ira furiose del Senior non diminuera usque illo habera complite tote le propositos intendite. In le tempores futur vos lo comprendera.