Biblia/Vetule Testamento/Jeremia/Jeremia 34

Jeremia

34

Un advertimento pro rege Zedekia

¹Le message del Senior perveniva a Jeremia quando Nebuchadnezzar, rege de Babylonia, attaccava Jerusalem e le urbes circumstante con un grande armea. Iste armea consisteva de truppas ex le regnos que ille dominava. Isto esseva lo que le Senior, Deo de Israel, diceva a Jeremia: ²“Vade e parla a Zedekia, rege de Juda e dice le: ‘Isto es lo que le Senior dice: Io es sur le puncto de delivrar iste citate al rege de Babylon e ille lo incendiara. ³Tu non potera fugir de su manos ma tu essera capturate e portate a incontrar le rege de Babylon facie a facie. Postea tu essera exiliate a Babylon’.

⁴Totevia, audi iste promissa del Senior, oh Zedekia, rege de Juda: ‘Tu non morira per le gladio ⁵ma tu morira in pace. On comburera incenso in tu memoria, justo como on faceva pro tu ancestres, le reges qui te precedeva. On lugera pro te e le gente dicera: ‘Guai, nostre domino ha morite!’. Isto es lo que io ha decretate, dice le Senior’”.

⁶Le propheta Jeremia diceva tote iste cosas al rege Zedekia de Juda in Jerusalem. ⁷Ille lo faceva durante que le armea del rege de Babylon pugnava contra Jerusalem e contra omne citates de Juda que non ancora habeva essite conquirite, contra Lachis e contra Azeka.

Libertate pro le sclavos hebree

⁸Iste message del Senior perveniva a Jeremia depost que rege Zedekia habeva establite un pacto con le populo, proclamante libertate pro le sclavos. ⁹Ille habeva ordinate a tote le populo de liberar lor sclavos hebree - sia homine sia feminas. Il es nunc illegal detener in sclavitude judeos, qui es nostre fratres. ¹⁰Le officieros e tote le populo habeva obedite al commando del rege, ¹¹ma plus tarde illes cambiava opinion. Illes se prendeva itero le homines e le feminas qui habeva liberate, fortiante les esser sclavos de novo.

¹²Assi le Senior les dava iste message per le medio de Jeremia: ¹³“Isto es lo que le Senior, le Deo de Israel, dice: Io establiva un pacto con vostre ancestres multe tempore retro quando io les faceva sortir de Egypto, ubi illes habeva rendite sclavos. ¹⁴Io les diceva que cata sclavo hebree debe esser liberate depost haber servite sex annos^[1]. Vostre ancestres, tamen, non me obediva e non me prestava attention. ¹⁵Recentemente, tamen, vos vos repentiva e faceva lo que es juste a mi oculos. Vos liberava vostre sclavos e faceva un pacto solemne con me in le Templo que porta mi nomine. ¹⁶Ma plus tarde vos reverteva vostre actiones e monstrava que de facto vos non me honora. Vos prendeva itero le homines e le feminas qui vos habeva liberate, fortiante les de novo esser vostre sclavos.

¹⁷Ergo, isto es lo que le Senior dice: “Vos non me obediva vermente e non concedeva libertate a vostre proximo e compatriota. Propter isto io vos concedera libertate al guerra, al fame e al maladia de ager contra vos. Io, le Senior, lo assere^[2]! Vos essera un objecto de horror pro tote le nationes del Terra. ¹⁸Quia vos non observava e infringeva le terminos de nostre pacto, io vos rendera sicut le vitellos que vos scinde in duo partes e in le medio del quales vos passa pro solemnisar vostre votos. ¹⁹Si, io findera vos, sia le principes de Jerusalem, sia le officieros^[3] de Juda, sia le sacerdotes, sia le gente commun - quia vos ha infringite vostre pacto. ²⁰Io vos delivrara a vostre inimicos e illes vos occidera. Vostre corpores devenira nutrimento de vultures e animales salvage.

²¹Io livrara alsi a vostre inimicos, le armea del rege de Babylonia, Rege Zedekia de Juda e su officieros. Quanquam illo recedeva de Jerusalem, ²²io commandara al armea de Babylon de retornar. Illo combattera contra iste citate, lo capturara e lo incendiara. Io alsi rendera le citates de Juda tanto desolate que in illos nemo los habitara”.

Notas

1. Cfr. Deuteronomio 15:12-18 pro le texto complete de iste lege. On mentiona hic solmente le prime parte.
2. O “oraculo del Senior”.
3. O “eunucos”.