Le Proverbios

Capitulo 14

¹Un femina sapiente edifica su domo, ma un femina insipiente lo destrue con su proprie manos.

²Illes qui ambula per le recte itinere time Deo; illes qui cammina per vias infame le despice.

³Le discursos superbe del insipientes deveni un virga que verbera lor mesme dorso, ma le discursos del sapiente le custodia.

⁴Ubi il non ha boves le alveo de alimentation in le stabulo es vacue, ma on necessa un forte bove pro un recolta abundante.

⁵Un teste fidel non mente, ma un teste false dice mentitas.

⁶Un irrisor quere sapientia e nunquam lo trova, ma le cognoscentia perveni facilemente a illes que ha intendimento.

⁷Recede del insipientes, quia tu non trovara cognition super lor labios.

⁸Le prudentes comprende ubi illes vade, ma le insipientes decipe se mesme.

⁹Le insipientes non admitte esser peccatores, ma le justos lo recognosce e quere gratia.

¹⁰Le corde cognosce su proprie amaritude, e nulle extranee pote plenmente prender parte a su gaudio.

¹¹Le domo del impios essera destruite, ma le tabernaculos^[1] del justos va florescer.

¹²Il ha un via que pare recte al homines, ma illo conduce al morte.

¹³Le riso pote teger dolor de corde: quando le gaudio termina, le dolor remane.

¹⁴Qui decede del via del justitia essera repagate in consequentia, ma bon personas essera recompensate.

¹⁵Solmente personas ingenue^[2] crede a toto lo que illes audi. Personas astute considera attentivemente lor passos.

¹⁶Un persona sage es caute e evita le periculo, ma le insipiente transi le limites del prudentia e es troppo confidente.

¹⁷Personas impatiente face insipientias e personas intrigante es odiate.

¹⁸Personas naive es revestite de follia, ma personas astute es coronate de cognoscientia.

¹⁹Mal personas se inclinara ante a bon personas; le impios se inclinara ante al portas del justos.

²⁰Pauperes es dispreciate mesmo de lor vicinos, durante que le riccos ha multe “amicos”.

²¹Qui disprecia su proximo pecca ma qui es misericordiose verso le pauperes, essera beate.

²²Nonne erra, qui opera le mal? Ma si vos plana facer le ben, vos recipera misericordia e fidelitate.

²³Omne labor diligente ganiara abundantia, ma simplemente parlar de illo comporta paupertate.

²⁴Le ricchessa es un corona pro le sapiente, ma le effortios del insipientes comporta solmente fatuitate.

²⁵Un teste fidel salva vitas, ma un false teste es un traitor.

²⁶Illes qui time le Senior remane in securitate; illes essera un refugio pro su filios.

²⁷Le timor del Senior es un fonte de vita; illo offere un escappamento dal trappas del morte.

²⁸Un population que cresce de numero es le gloria del rege, ma le paucitate del populo es le ruina del princes.

²⁹Personas patiente retine lor ira, ma personas impatiente exalta lor insipientia.

³⁰Un spirito tranquille revivisce le corde, ma le invidia es sicut le cancere del osteos.

³¹Qui opprime le paupere insulta su Factor, ma qui ha misericordia de illes le honora.

³²Un mal persona va esser abattite per su proprie impietate, ma un persona juste se refugia in su integritate.

³³Le sapientia trova reposo in le corde del persona prudente. Illo non es cognoscite in le interior del insipientes.

³⁴Le justitia exalta un nation, ma le peccato es un disgratia pro qualcunque populo.

³⁵Ministros intelligente allegra un rege, ma su ira cade super illes que age vergoniosemente.