Biblia/Vetule Testamento/Reges/1Reges 3

1 Reges

3

Le Senior da sapientia a Salomon

¹Salomon contraheva un alliantia de affinitate con Pharaon, rege de Egypto. Pro isso, ille se maritava con un del filias de Pharaon. Ille la portava a in le citate de David donec ille compliva le edification de su palatio, del templo del Senior e del muralias circa Jerusalem. ²In ille tempores le populo de Israel offereva sacrificios a Deo in locos de culto local^[1], quia pro honorar le nomine del Senior, un templo non ancora habeva essite edificate.

³Salomon demonstrava su loyalitate al Senior^[2] sequente le preceptos de David, su patre, excepte que ille offereva sacrificios e combureva incenso in le locos local de culto. ⁴Le loco le plus importante de illos esseva Gibeon; ita, le rege vadeva ibi e offereva a Deo sur le altar mille holocaustos. ⁵Celle nocte, le Senior appareva a Salomon in un sonio, e Deo diceva: “Pete quod tu vole, e io te lo dara!”. ⁶Salomon replicava: “Tu esseva grandemente misericordiose verso tu servitor David, mi patre, quia ille se conduceva coram te in veritate, justitia e corde recte. E tu continuava monstrar tu grande misericordia per dar le un filio qui sede hodie super su throno. ⁷Ora, oh Senior, mi Deo, tu faceva regnar me, tu servitor, pro mi patre David. Io, tamen, es un juvene homine de nulle experientia. ⁸Ecce me nunc in le medio de tu populo electe, un nation tanto grande e numerose que illes non poterea mesmo esser enumerate. ⁹Da, ergo, a tu servitor, un mente que sape discerner^[3], ut io pronuncia juste sententias^[4] pro tu populo e distingue inter le bon e le mal. Qui poterea, de facto, sin tu adjuta, judicar rectemente iste tu grande nation?”. ¹⁰Le Senior se complaceva que Salomon le habeva facite un tal requesta^[5]. ¹¹Deo le diceva: “Quia tu me peteva de dar te le habilitate de facer sage decisiones judiciari^[6] e non un vita longe, o ricchessa, o le vindicantia super tu inimicos, ¹²ecce, io te da lo que tu requireva! Io te dara un corde sapiente e intelligente, talmente que nemo altere lo habeva in le passato o unquam lo habera in le futuro. ¹³E io te dara alsi lo que tu non peteva - ricchessa e fama! Nulle altere rege in le mundo integre essera comparabile a te pro le resto de tu vita^[7]! ¹⁴Si tu me seque e obedi a mi decretos e mi commandamentos sicut faceva tu patre David, io te dara un vita longe”. ¹⁵Igitur, Salomon se eveliava e comprendeva que illo habeva essite un sonio. Ille retornava a Jerusalem, se poneva ante le Arca del Pacto del Senior, offereva holocaustos e offertas de pace. Deinde ille invitava omne su officieros^[8] a un grande banchetto.

Salomon demonstra su sapientia

¹⁶Alcun tempore plus tarde duo prostitutas veniva coram le rege pro accommodar un controversia que habeva inter illas. ¹⁷Un del feminas diceva: “Mi senior, io te obsecra: iste femina e io habita in le mesme domo. Io parturiva un infante durante que illa esseva apud me in le domo. ¹⁸Tres dies plus tarde, postquam io parturiva, mesmo iste femina parturiva un infante. Nos esseva insimul, e nemo altere esseva in le domo con nos, excepte nos duo.

¹⁹Le infante de iste femina, tamen, esseva accidentalmente suffocate quando illa, dormiente, rolava sur ille. ²⁰Assi, in le medio del nocte, illa se levava e prendeva mi infante de mi latere durante que io, tu serviente, dormiva, e se lo poneva in sino, e pois illa poneva su filio morte in le mie. ²¹Mane io me levava pro allactar le e io le trovava morte! Quando, tamen, io le examinava diligentemente sub le lumine, io comprendeva que tal infante non esseva mi filio”. ²²Le altere femina respondeva: “No, il non es assi, sed mi filio es vive! Il es le tue qui moriva!”. Ma le prime femina replicava: “Tu menti. Il es tu filio qui moriva, ma le mie vive!”. Assi, dunque, illas contendeva coram le rege.

²³Le rege diceva: “Un de vos dice: ‘Mi filio es vive, tu filio moriva’, durante que le altere dice: ‘No, tu filio es morte; mi filio es vive”. ²⁴Le rege, ergo, commandava: ‘Que un gladio me sia portate’. Assi un gladio esseva portate coram le rege. ²⁵Alora le rege diceva: “Divide le infante vive in duo partes e da un medietate a un femina e un medietate al altere femina!”. ²⁶Deinde le femina, qui esseva le ver matre del infante vive e cuje instinctos materne esseva excitate, diceva: “Mi senior, da a illa le filio vivente! Quecunque tu face, io te obsecra, non le occide!”. Ma le altere femina diceva: “Le infante non sia date ni a me ni a illa; que ille sia taliate in duo partes!”. ²⁷Alora le rege diceva: “Non occide le infante: le prime es su matre!”. ²⁸Ita, quando omne Israel audiva re le decision judiciari que le rege habeva facite, illes incipeva haber grande respecto^[9] pro le rege, quia illes comprendeva que ille possedeva grande sapientia divin pro facer recte decisiones judiciari.

Notas

1. O “alte locos”.
2. O “amava le Senior”.
3. O “un corde docile”.
4. O “facer”.
5. O “tu grande populo”.
6. O “sapientia in governar iste populo”.
7. O “tu essera le rege le plus magne de tu generation”.
8. O “servitores”.
9. O “timor”.