Libre de Memorias/1381

← 1380

1381 Libre de Memorias

1382 →

Lan MCCCLXXXI foron Cossols,

• Mesie Esteve Cros, per Taulas.
• Senhor Duran de Guirgols, per Mercadies.
• Senhor Frances Barrieyra, per Mazel.
• Senhor Johan de Bon Servisi, per Mesies.
• Senhor Johan Dolha, per Sabaties.
• Maystre Sans Symeon, per Fabres.
• Senhor Bernat Jolia, per Lahor.

Foron Clavaris.

• Ramon Emengau, per Mercadies.
• Peyre Puech, per Messies.
• Huc Miquel, per Sabaties.
• Maystre Johan Ayraut, per Fabres.

Feron de talha aquel an, un franc per denier.

Pus feron autra talha ad ops de la muralha, IIII gros per denier.

Foron levayres de Bans.

• Ramon Cotelie, per Taulas.
• Jacme Sicre, per Mazel.
• Esteve Cambavielha, per Lahor.

Foron Carrayries.

• Ramon Brenguie, per Taulas.
• Johan Benezeg, per Mercadies.
• Johan Masens, per Mesies.
• Maystre P.Rogie, per Fabres.

Foron Caritadies.

• Mesie Bertran Andrieu, per Taulas.
• Paul Barba, per Mercadier.
• Bernat Roquacels, per Mazel.
• Johan Crusi, per Sabaties.

Lan dessus dig MCCCLXXXI, a VIII de setembre, que fouc lo jorn de Nostra Dona de setembre, se auisteron los senhors Cossols de Bezes, am tot lor honorable cosselh a la Mayo comuna, per consulta sus la intrada de mossenhor lo duc de Berri, que era lottenen del Rey de Fransa nostre senhor, en las partidas de Lenga-doc, e en lo dugat de Guiayne; et els estan en lo cosselh, venguero motas genz plenas de mals esperitz, et esperezo que lo cosselh fos defenitz; e quan las portas foron ubertas, comesseron a far mot gran rumor; tant que totz aquels del cosselh aguezo gran paor, e tornezon a reyre dedins la Mayo comuna, e tanqueron las portas: e aquels ples de totas malas enequitatz, comessero a cridar ad armas; e la horas totz aquels que eron dins la Mayo comuna, van se totz esbayr; e totz aquels ples de mal esperitz, trenquero las portas, ambachas et am conhassas: et alcus bons senhors van sen montar sus la tor de la dicha Mayo, affin que fosso pus segurs. Els ditz ples de totz mals esperitz, van venir am fuoc, e van lo metre a la tor; en tal guiza, que totz aquels que lay eron, van ardre et cremar, exeptat alcus senhors, que per puor del fuoc, sauteron de la tor aval, losquals senhors aisi mezeis foron mortz.

Aysso son los noms desquels senhors que arderon en la tor:

• Senhor Bernat Guitart, borzes,
• Mesie Guilhem de Taurel, licenciat en leys,
• Senhor Jacme Boto, borzes,
• Maystre Ramon Genieys,
• Maystre Guiraut Got, notari de la Mayo comuna,
• Paul Barba, mercadie,
• Lo filh den Jacme Salamo de Thesa,
• Mossen Esteve Carbone, capela dels sobreditz senhor Bernat Guitart.

Aquels que sautero de la tor per pahor del fuoc:

• Senhor Ramon Alari, Borzes,
• Johan Sabatie, que era bothelier del senhor Guitart.

En apres quant agron fach aquest horrible fach; los dits ples de totz mals esperitz, van sen anar per la viela, e per los hostals, e van aussir et pesseiar aquels que se segon:

• Senhor Brenguie Ferrier, sirven d'armas, et seu gros vaylet am el,
• Senhor Ramon Bermon, borzes,
• Senhor Johan Teron, borzes,
• Senhor Andrieu Astrebo, jove,
• Senhor Peyre Gemeys,
• Peyre Cava, conhat del senhor Johan Bermon,
• Bona Grassia, lo sirven; Guiraudo, lo sirven.

Et quant aguezon mortz et aussitz totas aquestas bonas gens, sen van anar per la viela, rauban e pilhan los hostals des bos-homes; e mesclet si, tanta de gent, que non se poyre nommar: mal a lur ops; que pueysas ne fouc facha gran justicia, que ne foron escapitatz et pendutz totz aquels de totz estagz; e foron fachas las forchas de la peyra que son foras lo portal de Presicadors, huoc foron messes totz; et deviset las dichas forchas e las fes far maystre Peyre Fabre, notari, que era lottenen de viguier adonx, et si el agues un pauc mais viscut............

Aquels que foron escapitatz en la plassa sus una vit de truelh:

• Johan Huguet, sirven del horc de Sant Jacme,
• Cabot Alias Bonet, lahorayre,
• Guilhem Amat, teisseyre,
• Peyre Amat, teisseyre.

Aquels que foron pendutz son aquestes:

• Esteve Boia, teisseyre.
• Pons Tantusel, teisseyre.
• Johan Pastre, teisseyre.
• Bernat Gontart, teisseyre.
• Guilhem Remence, teisseyre.
• Johan Sonie, teisseyre.
• Pons Pepi, teisseyre.
• Johan Sauze, teisseyre.
• Peyre Bira, teisseyre.
• Emengau Andrieu e son fraire, teisseyro.
• Bernat Emengau, teisseyre.
• Bernat Vezola, teisseyre.
• Peyre Trebes, sabatie.
• Peyre Braconet et son filh, sabaties,
• Bernat Massal, lahorayre,
• P.Salvayre, lahorayre,
• Guilhem Massellia, lahorayre,
• Duran Bedos, lahorayre,
• Johan Caraman e son filh,
• Guilhem Peyrie, lahorayre,
• Johan Labana, parayre,
• Guilhem Caratie, sirven,
• Guilhem Lombes, trompayre,
• Andrieu Nicholan Grida,
• Ramon lo Bog, lahorayre,
• Johan Botagrais, lahorayre,
• Guilhem lo fustie,
• Guilhem Sabatie, fusie,
• Gamot e sa molher, lahorayre,
• Esteve Balhot, lahorayre,
• Johan Auriac, teissayre,
• G. del Bost, lahorayre,
• Girart lo frances,
• Gasto,
• Johan Gautie, lahorayre,
• Lo genre de G.B., monie.

Et sia memoria a totz, qui aquestas caussas dessus dichas ausiran ny legiran, que aion a dir, manifestar, a lur enfans et a totz aquels que ho demandaran, per tal que se aion a castiar, de esser rebelles contra nostre senhor lo Rey de Fransa, ni als seus que regiran son Rialme, ni a sos officiers; e non remenhs vuelho esser obediens als senhors Cossols, et az aquels que regiran los cossolats; et pertal que cascun y prenga yssemple, regardo la gran destruccio et dampnatge que la viela de Bezes e lo poble na pres e auffertat, ny la gran justicia que sen es facha, que plus de cent personas ne son estatz destrutz e justiciatz qui descapitatz, qui escartayratz, qui pendutz; et aital fara, aital perira: perque cascun e cascuna sen aia a gardar, que vuelhan ben fer et lo mal layssar

(ca) Aquí el manuscrit segueix amb dos fulles en blanc.
(en) Here, the manuscript continues with two blank pages.
(es) Aquí el manuscrito sigue con dos hojas en blanco.