This page has been proofread.
25
mǎ-tuo̿i, 10.
- Ŭ liōng nêng chṳ̆ ko̤̿ da̿u ŭ mǔing-si̿-tī iông Iǎ-Sú gâ̤ miâng-siáng.
- ¶ Gṳ̀ ka̿ing-ka̿ing chṳ̆ ko̤̿, iǔ nêng iáu-diū cì-ciă ǎ-ciě nă gṳ̌ mî-diū hā Iǎ-Sú-di̿ lâ̤.
- Gṳ̌ dāi-tiāu làu, ǎ-ciě ŏ̤ uā dī: duōi-gá-nêng dú cèng gǐ-ī, gō̤-uā, Da̿u Ì-să̤-liĕ nêng dǐ-bíng cù-cě̤ng ēng-nǎing gi̿ng-diō̤ iŏ̤ng-gă̤-sĭ gâ̤ dī.
- Cǒng-lâ̤ Huă-lī-so̿ nêng uā, Gṳ̀ sī ka̿u-diū gṳ̌-uâng dāi-tiāu gṳ̌.
- ¶ Iǎ-Sú ciū ko̤̿ gŏ̤ sêng, gŏ̤ hióng-lǐ, da̿u lǐ-ba̿i-dǒ̤ng-di̿ háu nêng, gǒ̤ng tíng gŏ gâ̤ hǎu se̿ng-sǐ, í bă-sia̿ng gŏ̤ iōng gâ̤ bāng-kǔ.
- Chū-gi̿ng ŭ cèng cāi nêng, ciū kǒ̤-lǐng gṳ̀, éng-ṳē gṳ̀ kǔ-chǔ mǎu báing-bō̤, su̿-siōng cì-bó̤ng iông mǎu nêng ia̿ng ĭ-búing.
- Iǎ-Sú ciū iáu hă-sáing uā, Cǎu-ciě ì-cài cèng cāi, cāi-cǎu gâ̤ nêng siǎu.
- Gu̿-chu̿ nì niōng giǔ miâu-Cṳ̌ hǎng ca̿-dī nêng chṳ̆ ko̤̿ cāi gṳ̀ gâ̤ cǎu.
Di̿ 10 Cióng.
- Iǎ-Sú ciū hǎng sí-nī-ciă hă-sáing lâ̤, nà gṳ̌ing-ba̿ng nă gṳ̀ ŏ̤ dāi-tiāu gṳ̌, í hǎu gŏ̤ iōng gâ̤ bāng-kǔ.
- ¶ Sí-nī-ciă sǎ̤-dǔ gâ̤ miâng gi̿ da̿u à-bíng: Tê cì-ciă sī Sái-mô̤ng, ǐ hǎng ca̿ Bǐ-dă̤, iáu gṳ̀ hiáng-dī Úing-dă̤-liĕ; Sái-bǐ-tuo̿i gâ̤ gṳ̌ing Ngǎ-gŏ̤, iáu gṳ̀ gâ̤ hiáng-dī Iŏ̤-hu̿ing;
- Hǐ-lì, Bǎ-dó̤-lô̤-mǎi; Dó̤-mǎ, siú-sṳe̿ gâ̤ Mǎ-tuo̿i; Ngā-là̤-hǐ gâ̤ gṳ̌ing Ngǎ-gŏ̤, iáu Duŏi-tuo̿i.
- Sái-mô̤ng ǐ hǎng ca̿ chiĕ-séng; gu̿ iǔ māi Iǎ-Sú gâ̤ Gá-liŏ̤ nêng, Iǔ-duōi.
- Iǎ-Sú hǎng iŏ̤ng sí-niē nêng ko̤̿, gáu-dō gṳ̀, uā, Biē-gŏ-nêng gâ̤ diō̤ nì ēng niōng giǎng, Să-mǎ-lī-ngā nêng gâ̤ sêng-dǐ iǎ ēng niōng di̿ ko̤̿.
- Ga̿ing niōng ko̤̿ Ì-să̤-liĕ ŭ cì cù mǎu-tiāu gâ̤ iông-di̿ ko̤̿.
