-Uy, oo, danay magpasalista. Labot pa... diri ko buót tumipa kan makaraig.
-Diri pagkontra, usa la iní nga.... Hi Placido waray na pamamati, harayo na, malaksi an lakat tipakadto ha klase. Nakabati hiya hin damo na nga adsum! adsum! Panuláy, nagpapasalista!.... Nanagmit han pitad ngan inmabót hiya ngadto ha purtahan, an pagbasa nakadto na ha/Q
-Tinamaan ng!.... -nagpulóng, kinagát an im-im. Nag-aláng, kun masulód, kun diri; nabutangán nahiya hin bagis ngan diri na makukuha. An pagkadto ha klase diri pag-arám kundi basi mawaray bagis; an binubuhat ha klase amo la an pagsubay han leksiyon ha sinaulo, pagbasa, ngan kun daw may iba pa, usa nga sukna nga halipot, halarom, salukniban, tiriguhon; matuod diri nawawaray an gutiay nga laygay, an kabatasanan! Mahatungód han pagpaubós, pagbuutan ngan pagtahod han kapadian, ngan hiya, hi Placido, mapinaubsanon, buutan ngan matinahuron. Nalakat na unta kundi nahanumdom nga tiharani na an pangiksamen ngan waray pa ngani hiya pakianhi han iya propesor nga bagá diri la ngani nag-aasá ha iya; maupay adto nga higayón nga ipakakaabát ha iya basi hiya kilal'on. An paghikilal'i tigaman hin waray ruhaduha nga pakapasár, kay kun masayunay la an paghulog hin usa nga diri kinikilala, nagkikinahanglan hin matig-a nga kasingkasing basi diri maalantad ha pakakita hin usa nga batan'on nga ha adlaw-adlaw. dará han iya panagway, nadiri nga makarag in usa katuig haniya kinabuhi.
Salit hi Placido sinmulód ngan diri naikid sugad haniya nababatasan, kundi nag-aringasá pagpatagaktak han iya mga tikód. Ngan linmabis hin katumani han iya talinguha! Siniplatán han propesor, nagkuriot, pinmiling han ulo daw karuyag sidngon:
-Waray batasan! Pagbabaydan mo ito yana!
