han nga balaod amo an pag-uswag ngan pagtikaupay, adto, kay matadong, mangangaro unina hin mahugot nga kasayuran han angay maghatag, kay anó nga an riniribo nga mga sarabutan namagsisirom la ngan nagkabubutá, an dungóg han riniribo nga mga tawo ngan han kadam'an nga panahon nga nakarag ngan nakanugon! Ngan kun an mga tutdo han Evangelio may sag-od nga kamatuuran, magbabatón man liwat an kariburibuhan nga waray mahibaró hin pagtipig han pawa han ira sarabutan ngan han dungóg han ira kalág, sugad nga an Ginoo nangangaro han iya mga alagád hin kasayuran han mga sarabutan nga tinmugot nga paglupigan!"2
Angay lauyon an baláy nga inuukyan ni Makaraig. Dako, haluag, duduha kaandana nga may entreswelo nga nagkasi rinihasan hin makaruruyag, baga an kolehiyo ha siyahan nga mga uras ha aga, ngan an katirok nga mangulingulí tikang ha ikaunóm an takna tipaunhan. Ha sakób hiton panahón han urugyag han mga mangangasiró, tikang in usá nasulód han haluag nga sirong tubtob ha pag-abót han dakó nga andana, marisaw an katatawa, an rakya ug mga kiwá. Mga batan'on nga haros mga lubas nag-uurugyag han bola nga sipa, nag-eéhersisyo ha himnasyo didá hin mga dinalidali nga trapesyo: didá ha hagdan may kirigta hin wawaló o sisiyám nga may mga baston, pika, kalahit ngan pisi, kundi an mga naataki ngan han mga inaataki diri, ha kaudgan, nagkakaaanó; an kauróg han mga dabal nauntol ngadto ha bungkog han insik nga didá ha hagdan nagtitinda hin mga karan'on ug iba pa nga mahatirimo nga makuri matunaw. Ginlilibutan hin kadam'an nga kabataan, ginbubugtong an iya talunay nga halaba nga nabuskag ngan nagkakaprag, inaagawan hin hupya, pinakikitawaran ngan ginbubuhatan han ngatanán nga katinuyawán. An insik naguliat, nabuyayaw ngan nananampalas ha ngatanán nga yinaknan nga iya nasasamsam, upód an iya lugaringon, nabingít, natawá, nakikimaluoy, nagmamaupay hin kahimó kun an pagmaraot diri ginpupulsan o kun usa balikád.
