-Ah! Malaot itó! Bo kosyesya! Di kilistyano! Ikaw limonyo, Salamahe! Tusu, tusu! ug iba pa.
Pik! pak! Di bale! Matawatawa na liwat; kun didto la ha iya bungkog uumban an baston diri makakaano han iya pagtinda, igo na la an iya guliat: "Ayaw intilimisi, ha? Ayaw intilimisi!" Kundi, kun didá nahaiigo han lidong nga puno hin mga karan'on nagsusumpa na ngahaw hin diri na pagbalik, binubuhian na an ngatanán nga panampalas ngan mga pakaraot nga hinumdumán; an kabataan nadugang lugód hin pag-urit ha iya ngan kun naabat nga nauubusan na hin mga yayangbaton ngan nananakas na hin hopya ngan hin liso hin sandiya, amo na in pagbabaydi hin impas ngan an insik nalakát malipay, nagtitinawa, nakiró ngan binabalos hin ugay nga mahinay nga balbag hin baston nga dapit pagikan ha iya han mga estudyantes.
-Huwaya, homya!
Mga konsyerto hin piyano ngan byolin, sista ngan kurdyon, iginkakabatunbaton han karag-intok nga dubudob han mga baston tikang didto han pag-aradman han eskrima. Ďidá ha palibot hin usa nga dako ngan halapad nga lamisa an mga magturuon ha Ateneo nagsusurát, naghuhuman han ira mga bul-iw, nagsusupát han mga problema tupad han ibá nga nagsusurát ngadto han ira minatam-is, ha limbaon nga sida nga papel nga may mga dibuho; may usa nga naghihimo hin melodrama katupad hin nagtutuón pagplawta, salit an mga inangay nga pulong daan na ginhuhuyóp waray pa ngani hibusog. Ngadto ha unhan, an mga labáw, mga estudyante ha hagtaas na nga pag-aradman nga nanngangalsetin hin sida ngan binurdahan an mga sinilas, nanhihilangkag hin pagsinunglog han mga gudti pa kay pinanmimiknit an mga talinga nga magpulapulá na han damo na nga latik; may duduha o tutuló nga nagtatalo hin usa nga gutiay pa nga nagsisiniyabaw, nagtitinuok ngan nagsisikad han mga sintas han iya karsonsilyo; kay ira ginhuhubuan... nga nagpapanlulunti ug nagtitinuok. Didto hin usa nga sulód, ha palibot hin usa nga agmahan nga lamisa may namamag-uṛugyag hin rebesino salakot hin katatawa ngan mga durugas nga nakakaurit hin usa nga nag-aarám han leksiyon kundi ha kamatuuran naghuhulat han iya turno pag-uyág. May usa nga dinmaop duro an hangin, maaringasa ngan dinmuok ha lamisa.
-Kamga bisyoso niyo!- nagsiring; -aga pa hu-
