pelo maupay piliso lamo tawo, ha? Paksugo ikaw libistlo,
ha?
Han pagbalik nira Simoun ngan hi Quiroga ngadto ha uswag iginkirita didto han tima pa la paninihapon nga namamaglantugi: an tsampan amo an nakakapalaksi han mga dila ngan nagbabantad han mga utok. Bagá pasagad la an karukayakan.
Didto hin usa nga pundok nga may damo nga empleados, mga pirá nga senyora ngan hi D. Custodio, ginhihiruhimangraw in pagpadará hin usa nga komisyon ngadto ha India pag-usisa han kaangayan mahatungód han sapatos han mga sundalo.
-Hirá hino man ito nga manhihiapi hito nga komisyon? -nagpakianá in usa nga labáw nga senyora.
-Usa nga koronel, duhá nga opisyal ngan han umangkon ni S. E.
-Upat?,-nagpakianá in usa nga empleado:Ambot ngahaw hito nga komisyon. Kun magkaempate? May ada nira pagkatakós?
-Amo ito an ipinapakiana ko,-sinmagbang in usa: nasiring ako nga mapakadto man in usa nga sibil, usa nga waray hilig hin pagkamilitar... usa nga parapanhimó hin sapatos, pananglitan...
-Amo na,—sinmumpay in parabaligya hin sapatos nga tikang ha gawás;-kundi, tungód kay diri mahihimo nga say pakadtuon in usa nga indio, sugad man diri mahihimo in usa nga makáw, ngan an amo la dinhi nga katsila nga parapanhimo hin sapatos nangaro hin mahál nga suhol ha inadlaw...
-Kundi, kay ano nga pagtutun-an pa an sapatos?- nagpakianá in usa nga labáw nga senyora;-diri man adá ito sapatos nga kanán mga artilyero nga katsila! An mga indiyo makakahimo hin diri la managsapatos sama kun aadto ha ira bungto.
-Amo, ngan an kaha diri na mauuraura kaibani, sinmumpay in usa nga senyora nga balo nga diri nasasadngan han iya pensyon.
-Kundi, panginano daw kamo,-nagsiring in usa han mga tambong nga sangkay han mga opisyales nga api han komisyon.-Matuod ito nga kadam'an han mga indiyo diri namamag-sapatos didto ha ira bungto, kundi diri ngatanán, ngan diri magsama an paglakát ha kalugaringon nga kaburut'on ngan han aadto ha serbisyo: diri ka makakagpili han uras, sugad man han dalan, ngan diri
