pangasoy han kasayuran, ngan tungód kay waray man
espeho ha atubangan nga makakapangimbuwa han iya
sumat, nagsinumat han ngatanán nga bulurot nga iya
nahimo ngadá han pati hiya waray na sasabót han iya
ginyiyinakan.
-Niyan makikita niyo nga ngatanán aadá la ha pag- kita han mga matá.
Hi Mr. Leeds, tuód gud nga yankee lubos nga itóm an sul-ot, tinmapó ha ira hin may katalahuran. Maupay magyakan han kinatsilá tungód kay nag-ukóy hin maiha nga mga tuig didto ha America del Sur. Waray pagkuri pagtugot han pinangaro han mga bisita; nagsiring nga makakahimo hira hin pag-usisa han ngatanán, ubos, ha di pa magtitikáng ngan ha katapos han paguwá; hamtang magpapaguwá nakimaluoy nga diri managkiwá. Hi Ben Zayb nahapapahiyóm ngan nagpaparasa na han disgusto nga iya igin-iinamdam han Amerikano.
An ruwáng, nga binirayan hin itóm palibot, sinugaán hin mga kadaan nga kingké de alcohol. Usa nga baral nga pinutós hin itóm nga tersyopelo asya in nagtutungá han ruwáng; usa nga katungá luób hin mga lingkuran nga kanán mga magkirita, ngan an luyó nga katungá say binutangán hin tarima nga inalkumbrahan hin baláng. An katungá han tarima tinutukdawán hin usa nga lamisa nga tinahuban hin mahal nga dugnit nga lana nga pinintaran hin mga kalabera nga may mga kahulugan. An mise en scene nga ruwáng bagá kanán nagtatagaminatáy nga gilayón hinmunób ha mga kaburut'on han maglipayon nga mga bisita. Inmukóy an mga patiawtiaw, nagtikáng an huringhuring ngan bisan kun may pipirá nga karuyag magpakita nga waray nira kaalantad, ha ira mga im-im waray inaabat nga hiyom. Ngatanán binmati sugad hin sinmaká hirá hin baláy nga nagtatagaminatáy. An pamarág hin insenso ngan hin kandila nga pinarungan hin laga pinmadugang hadto nga kahimtang. Hi D. Custodio ngan hi P. Salvi naggisagdunay kun diri ba angay igdiri hin pagpaguwá an sugad hadto nga mga kiritaon.
Hi Ben Zayb, basi pag-aghat hin kamarugyaw han mga kulbaon ngan basi hi Mr. Leeds malisang, nagsiring
