han mga gawi didto ha mga Universidad han namamaglugaring nga mga tuna: kadako han ginkakalainan!
Ginsinunod ni Placido an alahero.
-Senyor Simoun, senyor Simoun!-nganiya. An alahero hadto nga uras nag-iisarakay hin usa nga kotse. Han pakakitá kan Placido inmukóy.
-Karuyag ko unta mangaro ha mo hin kaburut'- on... mga duhá kapulóng!- an iya siring.
Hi Simoun kinmilos hin kasumó kundi hi Placido, dará han iya kaurát, waray umabat. Ha laktod nga pulong gin-asuyan han batan'on an nahinabó ha iya ngan magsumát han iya tuyo pagsakay ha Hongkong.
Kay ano? nagpakiana hi Simoun nga nagkikinita ha iya hin tutok ha luyó han iya matagom nga salaming.
Hi Placido waray magbatón. Hi Simoun hinmangád, hinmiyom han iya mahagkot ug mamingaw nga tawá ngan magsiring kan Placido.
-Maupay! upód ha akon. Ngadto ha Calle Iris!- siniring an kotsero.
Hi Simoun waray la yakanyakan hamtang hirá nagsasakay, sugad hin nalilibáng pagpinanhunahuná hin usa nga butáng nga kasuruk'an. Hi Placido, nga naghihinulat nga pakiyaknan, waray la pagtitingól ngan naliliáw pagkinita han damo nga magkaralakát pagpahimulos han kamasanag han bulan. Mga batan'on, magparapdis nga mga mag-irigtos, mga nagsisihigugma, nga sinusunod ha luyó han magminangnuon nga iroy o dadá; magburunyog nga mga estudyantes nga mga buság an bisti, nga nadugáng hin kamabuság ha sirong ha bulán; mga sundalo nga mga hubughubog, nga nanhihisakáy hin kotse, tigda tig-unom, tikadto panungbaláy hin usa nga inatpan hin pawod nga ginsisingbahan kan Citeres; kabataan nga nag-uurugyag han "inom-inom", kainsikan nga magbaraligya hin tubó ug ibá pa, amo an nakakapunó han kalsada ngan ha sirong han maranggat nga bulan bagá in mga binuhi nga urusahon ngan magpakawiwili. Didto hin usa nga balay nagtitinukar hin balse in usa nga orkesta ngan hinkikit'an nga nananayaw in magparapdis ha sirong han pawa hin mga kingke ngan paról... Hin kabastos nga kiritaon kun itinatanding han hinkikit'an ha kalsada! Ngan didá ha pagdinumdom han Hongkong nahapapausa, ano daw kun an mga gab-i didto nga bulanon kun sugad ba hin kasidayanon, kama-
