Hi P. Camorra, nga diri nakakagkitá, hinulwaán han
matá ngan naglinaway; kundi nakigbalingkot kan Ben
Zayb nga an tuman la nga nangalasag kay nagpinanhunahuná
han mga tiket nga waray bayad nga igpapadará
ha iya han Empresa. Hi don Custodio nahamangraw
hin moralidad, tuluuhan, mag-upay nga pamatasan
ug iba pa.
-Kundi,- namamaribad an manunurat, -kun an aton mga sainetes nga may mga paaliday nga pulong ngan mga pasambingay nga yakán nga tigduha in kahulugan...
-Kundi, bisan la kay kinatsilá,-naniguro, naguliat an darayawon nga konsehal nga naglalaga hin langitnon nga kasina; mga kalaw-ayan ha pranses! Hombre, por Dios, Ben Zayb! Ito, mga sano pa man diri mahihimo!
Ngan linuluwas an mga sano pa man hin kusóg nga kanán tutuló nga Guzman nga gintatarhog pagpatayi hin usa nga purgas kun diri magsumát hin karuhaán nga Taripa. Hi P. Irene, kaiya naman, nauyom kan don Custodio ngan nadiri gud han mga operetas francesas, Puf! Hiyá nahangadto ha Paris, kundi waray gud hiya hitamak bisan na man la ha bangketa hin usa nga teatro. Salamat sa Dios!
Kundi an opereta francesa may adá liwát damo nga mga umurugop. An mga opisyales han ehersito ngan armada, sakót hini an mga ayudante han Heneral, an mga empleados ngan kadam'an nga mga senyores nagkakaiikág hin pagparasa pamati han yinaknan nga pranses ha baba han mga ungód nga parisienses; bulig ha ira an namagbiyahe ngadto ha M. M. ngan namagpasipara pagyakan hin gutiay nga pransés han nagbibiyahe pa, adton nanhingadto ha Paris ngan han ngatanán nga nagpapakailustrado. Didá hini an mga tagá Manila nabuhág hin duhá kabahín: an mga operetistas ngan han mga antioperetistas, nga binuligan hin mga senyores nga mga hamtong na, mga mag-abugho ngan magminangnuon han higugma han ira mga bana, ngan han may-adá mga nobyo, hamtang an mga waray kabilinggan ngan han mga maghusay ginmapíl hin kamga operetistas nga magbangís. Naggipadaradara hin mga surát nga kadam'an, namay-ada ngadto-nganhi, mga palibaklibak, titirok, sarabot, patigitigi hin sumat; hinmangrawán patí an pagribok han mga indiyo,
