aton kasangkayan. Say ginhihiruhimangraw in usa nga babayi nga waray didá.
—Bagá in kamakawán didá ha pansiteriya!—nagmugó hi Pecson hin gutiay nga tingog.
—Ngan an cancán?—nagpakianá hi Makaraig.
—Naghihiruhimangraw kun hain an maupay hitó pagsayawan!—nagsiring hi Sandoval hin himuot.
—Bagá an mga makáw dida ha pansiteriya!—nagsiríng liwat hi Pecson nauurit na.
Usá nga senyora, upód an iya bana, inmabót hadto nga uras ngan napakadto paglingkod didto han usá han duduhá pa nga palko nga waráy tawo. May paras nga bagá kanán rayna ngan naniplat hin nakakayubit han bug-os nga ruwáng sugad hin karuyag niya sidngon:
"Urhi ako ha iyo ngatanán umabót, mga bastos kamo nga mga probinsyana, urhi ako ha iyo umabót!" Kamatuuran, may mga tawo nga napakadto ha mga teatro sama hin usa nga asno didá ha rumba hin dalagan: An maurhi amo in nagdadaóg. May kilala namon nga mga buutan nga mga tawo nga siyahan mapabitay ugsa sumulód ha teatro nga diri pa magtitikang an primer acto. Kundi an kalipay han senyora waray pag-ihá; nakakitá nga may ada pa uusá nga palko nga basiyo; nagkuriot ngan nasinahan an iya bana ngan nag-inaringasa hin makaaralo nga damo in nangalás.
—Sst! sst!
—Mga estúpido! Bagá sugad hin nasabót hirá han pranses! —nagsiring naniplat hin hadianon nga pakatamáy han bug-os nga ruwáng ngan say hintadungán an palko ni Juanito kay an iya hunahuna nga didto pagtikáng an waray batasan nga "sst"
Ha kamatuuran hi Juanito amo an may salá; tikang ha tinikangan nagpapakamaaram han bisan ano, ngan naghihinambog, nahiyom, natawá, napakpak hin igo ha panahón bagá sugad hin waray niya hinlilipatán han pinamamagyinakan. Ngan diri an mimika han mga artistas an say niya ginbabantayán, kay diri ngani ngadto pagkikinita ha paguwaan. An banyaga nagsisiniring kan Paulita nga, kay may maghuruhusáy man nga kababayin'an kay hadton mga artistas, ano in pagginuol niya pagkinita ngadto ha hirayo... Hi Paulita nahakakaaló, natabon han bayhon han iya abaniko ngan nasiplat hin hilít kun nakain dapit hi Isagani nga waray gud tatawa ngan bisan na man
