tang an aringasa ug kamarugyaw han hagrani nga mga
establecimientos nagmimingaw na daw sugad hin karuyag mamati han nanhihitabó didá han bangkete. An
kamingaw bagá may ada paurusahon.
-Pagdiskurso na, Tadeo,-hinuringán ni Makaraig. Ginkasarabutan nga hi Sandoval, nga amo an batid ha pamulong, say magyayakan ha katapusan.
Hi Tadeo kay unob nga hubya, waray pag-andam ngan nagugupong. Hamtang naghihinigop hin halaba nga tanghon, nagpipinanhunahuná kun anó in iya bubuhaton, kundi nahanumdom hin usa nga pamulong nga iya gin-adman ha klase, iya nahunahunaan hin pagsubád hin may gutiay la nga kabalhinan.
-Hinigugma ko nga kabugtuan ha proyekto!- nagtikáng iginkukumpas an duduhá nga kimpit nga garamiton han insik ha pagkaon.
-Animal! buhii iton kimpit kay nabungkag na iním akon buháy! nagsiring an iya kasapit.
"Tinawag ako nganhi kay say niyo napili basi magpunó han nawarayan sulód."
-Diri ito imo!- inuláng ni Sandoval; diskurso kanán presidente han amon Liceo! ito nga
"Tinawag ako nganhi kay say niyo napili basi magpunó han nawarayan sulód nga bahín han akon... ulo (ngan say tinudlok an tiyán) kay binayaan hin usa nga bantog nga tawo tungód han iya doctrina cristiana ngan tungód han iya mga hilangkag ngan mga proyekto, angay mag-arog hin gutiay na panumduman, anó in masisiring hin usa nga sugad ha akon nga ginugutom kay waray pamahaw?"
-Aadi in liog, chicoo!- nagsiring an iya kasapit nga nagdidinuhol hin liog hin manok.
"May usa nga kaluto, senyores, nga say manggad hin usa nga bungto ngan yaná naginsusumaton ngan pataraw'an ha tuna, ngan ginlalawgaw yaná han mga gutóm nga kutsara han mga dagko nga magkaon nga tikang didto han mga tuna ha katundan hinín kalibutan... "ngan say tinutudlok hi Sandoval nga nakikiglambunit hin usa nga makugnot nga pakó hin manók.
-Ngan sugad man ha sidlangn,-sinmumpay an hinnabihan ngan itinambirik han kamót an iya kutsara paghimo hin balaraw basi mahaupód an ngatanán nga tangka.
