- Nga igpapahanungod ta han mga prayles,―nagsiring an tagá bisayas.
-Tungód han ka-mga-inalimangó hitón ira binubuhat.
-Amo, ngan ngarani ta hin torta de frailes!
Ngatanán nagsarabat: -Torta de frailes!
-Naprotesta ako ha ngaran hin usa katawo!-nagsiring hi Isagani.
-Ngan ako ha ngaran han mga alimango!-nagsiring hi Tadeo.
-Katalahuran, senyores, paghatag kita hin katalahuran! binmalik pagsiring hi Pecson nga punó an baba.
-An ikaupát nga linuto amo an pansit guisado nga igpapahanungod ta... han gobyerno ngan hini nga tuna!
Ngatanán naniplat ngadto kan Makaraig.
-Diri pa la maiha, senyores,-nagpadayon; -an pansit sinisiríng nga kanán insik o kanán haponés; lugaring tungod kay diri kinikilala didto ha China sugad man didto ha Japon, bagá pilipino, kundi an nagluluto hini nga sud'an ngan natulos han pulós amo an kainsikan. Asya man an nahananabó han gobyerno ngan han Filipinas: bagá kanán insik gobyerno ngan tuna, ta, kun oo, kun diri, may mga doktores ha Santa Madre... Ngatanán natiláw, ngatanán rinarasahan, kundi nayamid, nahuhugaw; amo man ini nga tuna, amo man an gobyerno nga waray katuhayan. Igpahanungod ta, balitaw, an pansit, ha tuna ngan ha pamunuan!
-Igpahanungod!- nagsarabat liwát.
-Diri ako mauyon!-nagyakán hi Isagani.
-Katalahuran, senyores, katalahuran han nanhihiunong! ginmuliat hi Pecson nga nagbarabad ha igbaw hin tulan hi manók.
-Igpahanungod ta an pansit kan Insik Quiroga, usá han uupát nga gahóm nga naguóp hinín kalibutan nga pilipinhon!--nag-agda hi Isagani.
-Ayáw! ha kan Eminencia Negra lugód!
_Saba kamo!- nagsiring in usá, dapít may dará nga paurusahon; -didá ha plasa may namamagtarutambak nga mga tawo nga nagkikinita ha aton ngan inín mga puto magpapakabatí.
Matuod man gud, may mga pundok hin mga usyuso namamagtinukdaw ha tungod han mga tangbuan ham-
