iba nga mga sumarakay, nalingkod in usa nga klerigo nga nagkikinita han mga hikirit’an nga namamagsunudsunod ha iya pangitaan. Tinatagan hiya hin wada han iya mga katarampo; an kalalakin’an, kun nalabay dida ha iya tungod, nanunukas han kalo, ngan an mga magsurugal diri nagpapasipara pagbutang han ira lamisa dida ha harani han iya linilingkuran. Adto nga padi talagsa la magyakan, din natabako ngan diri nagpapakamaisog, diri naglllikay han pakighitarampo han iba nga mga tawo ngan nabaton hin maupay ngan makiaangayon han mga pakigkatahod, daw sugad hin nakakasiring nga hiya ginpapasidunggan ngan ginpapatakos nga igkakilala. May dako na nga panuigon, an mga buhok haros busag na ngatanan kundi an iya kalawas baga madig-on la gihapon ngan, bisan kun nalingkod, tadong an lawas ngan an ulo tindog, kundi waray pagpalabilabi ug pagparayaw. Nalutod hiya ha kamananong ngan ha pagdara han kaburut’on, daw may iya pagsantop han kadungganan han iya pagkatawo ngan han pagkahitaas han iya katungdanan, han kabatasanan hikit’an nga mga klerigo nga indiyo, nga diri man ngani damo, nga hadto nga mga panahon namamagkapot hin pagkakuwadhutor o nagmamangno hin di pa dayon kakura ha usa nga bungto. Usa nga dalikyat nga pagsiplat han iya dagway, gawas han magbusag nga uban, hinkikilal’an dayon nga nahatatampo hiya han mga taga una nga panahon, ha una nga katulinan nga an mag-upay nga mga batan’on diri nahadlok hin pagtubyan han ira dungog ha pagsulod pagkapadi, hadto nga an mga klerigo nasiplat han mga prayle hin sugad hin igkasi, hadto nga an pagkapadi, han diri pa tinamay ngan linupig, nagkikinahanglan hin mga tawo, diri mga uripon; mga labaw nga sarabutan, diri ginarungan nga kaburut’on.' Dida han iya nawong nga masamdong ug himuot nababasa an pagkamahadong han kalag nga ginpadig-on han pag-aradman ngan han pag-isip-isip, ngan tingali ginsarihan hin inmagi nga mga hilom la nga kasakit ha kasingkasing. Adto nga klerigo amo hi P. Florentino, an bata ni Isagani, ngan an iya kaagi diri halaba asuyon:
Anak hin gimanggarani ngan sangyaw nga panimalay didto ha Manila, angayan an tindog ngan malipayon an panuron bahin ha pagpakita han mga tawo hin pagkatakos waray bumati hin kahilig ha pagkapadi; kundi
