salá? Ginpipirit ta ba ikaw nga bumulig ka pagpas'an
hitón akon kasalakban?
—Waray ruhaduha nga diri! —binmatón an hataas in katungdanan nga tinmikíg hin diri pagpalupig; —hi V. E. diri ha akon nagpipirit; hi V. E. diri makakahimo ha akon hin pagpirit, ha akon hin pagpirit pagbulig pagpas'an hiton iya kasalakban! Lain itón akon pagsabót hitón akon kasalakban, ngan tungod kay akon man kasalakban, magyayakán ako kay maiha na nga waray ako pagtitingól. Oh, diri ako pakitaon ni V. E. hitó nga mga kiwa kay kun ako napaabót nganhi tungód hiní o hadto nga katungdanan diri karuyag sidngon nga matalikód ako han akon mga katadungan, nga mapauripon na la ako, waráy tingog ngan waray dungog! Diri ko karuyag nga an España mawad'an hini nga makaruruyag nga ginhadian, hiton wawaló karibo nga mga buutan ug maginantuson nga mga sakop nga kanunay naghuhupót hin mga paglingo ug mga paglaom; kundi diri ko man liwát karuyag magdum-it han akon mga kamót didá ha pagpahimulos han ira kasugad nga diri angay hin tawo; diri ko karuyag nga sidngon mga sano nga, kabungkag han sinabutan, iginpadayon han España ha darudakó nga palakát, gintahuban la han iya bandera ngan hin mga pasasngilanan nga mga instituciones nga basi may malipát. Diri; an España basi dumako waray kinahanglan manlupog; an España igo ha iya ngahaw; an España darudakó hadto han waray pa niya ibá nga tuna kun diri an iya la nabawi dida ha mga kuló han moro! Ako espanyol man liwát, kundi ugsa magin-espanyol, tawo ako, ngan una han España ngan ha bawbaw han España, aadá an iya dungóg, aadá an hagtaas nga kamatuuran han panggawian, an dayon nga mga kamatuuran han dimaliwát nga pagkamatadong! Ah, nahapapausa ka nga sugad hiní an akon panhunahuna, kay waray mo kalibutan kun tiunano kadako han ngaran nga español, waray ka kalibutan, waray; an bagá ha imo, an espanyol mahihimo nga pirata, mahihimo nga kriminal, patootoo, buwaon, ngatanán, basta la diri makuhaan han iya hinkakaptan; an bagá ha akon an español angay tumalikód han ngatanán, ginhadian, kagamhanan, manggad, ngatanán, ngatanán gud ugsa mawará an dungóg! Ah, señor mio! Kitá naguliat ha pagdiri kun aton nababasa nga an kusóg nagpasulabı han katadungan, diri la kay
