Simoun? Nasamad didá han pangalagiw paglikáy han
nagdadakóp ha iya?
Inín urhi nga banabana amo an nasilhag nga may paghimatuód. Nakakabulig pagpadig'on hini nga telegrama, nga kinarawat diri pa la maiha, an diri mabagi nga kaburut'on nga igin-asoy ni Simoun tikang han pag-abót, hin diri gud pagpabulóng hin mediko nga tikang ha kabesera. Say la kinakarawat han alahero nga pagtambal an kan don Tiburcio mga pagmangno ngan bisan pa ngani may adá dayág nga diri pagtagya. Tungód hiní, nagpipinakiana hi P. Florentino kun ano iya bubuhaton kun umabót an Guardia Civil pagdakóp kan Simoun? An kamutangan han masakit diri natugot nga pagbantarón, say pa in harayo nga paglalaktan.... Kundi an telegrama nasiring; mamatay, mabuhi.
Hi P. Florentino waray na anay pagtuktok han iya turunggon ngan dinmaop han tangbuanan pagkinita han dagat. An mamingaw nga kamahamis nga waray gud bisan usa nga barko, bisan usá nga layag, waray ha iya pakahatag hin katigayunan. An gutiay nga puró nga nalalantaw ha hirayo, nag-uusaan, say la ha iya iginhihimangraw an iya pag-usaan nga nakakadugang hin kamamingaw han kahaluagan. An diri matukib, usahay ngula, nga kamakahurulop.
Gintalinguha han tigurang hin pagtukib han kahulugán han masamdong ngan naugday nga hiyom ni Simoun han pakakarawát han notisya nga pagdadakpon. Ano an kahulugan hadto nga hiyom? Ngan an usa nga tawá nga labí kamasubó, nga labi pa liwát han paghibaró nga mapakada ha mga ikawaló an takna ha gab-i? Ano an kahu- lugán hadto nga urusahon? Kay anó nga nadiri hi Simoun pagtago?
Nadangóp yaná ha iya panumduman an ibinantog nga pangamuyo ni San Juan Crisostomo han iya pag-ugop han eunuco nga hi Eutropio: "Waray masugad yaná nga panahón hin kaangay igsiring: Kalabyawan han mga paglabyaw, ngatanán ubos paglabyaw." (Vanitas vanitatum et omnia vanitas)
-Oo, adto nga Simoun nga manggaran, nga makagagahom, nga kinahahadlukán may uusá pa la kasimana, yaná, labí pa kamakapapaid kan Eutropio, namimiling hin huhurunan, ngan diri didto ha mga altar hin usá nga singbahán, kundi didá han makaluluoy nga baláy hin usá nga
