may adá ko apomorfina... may ada ko eter, cloroformo...
Ngan an padi nagpipinamiling han prasko nga, inuuyamán na, gumuliat hi Simoun:
-Kawang na... kawang na! Ayaw na pagkarag hin panahón! Mahadadará ko inín akon tinago!
An klerigo, nagugupong, nahapaluhód didá han pangaradian, nangadi ha tiilán han Kristo, tinago an bayhon didá han mga kamót ngan katima bumuhát nabúot ngan matadong daw sugad hin kinmarawat didto han iya Dios han ngatanán nga kadig-on, han ngatanán nga dungóg, han ngatanán nga gahóm han Hukóm han mga kasingkasing. Idinuok in usa nga butaka ha uluhán han masakit ngan nag-andam hin pamati.
Han siyahan nga mga pulong nga ihinuring ni Simoun, han pagsumát han iya totoo nga ngaran, an tigurang inmisol ngan naniplat hin may kahadlok. An masakit hinmiyom hin mapaít. Dará han kalas, an tawo nalipong anay, kundi ha gilayón naghiuli, ngan tumabon hin panyo ha iya bayhon binmalik paghilig basi mamati.
Iginsumát ni Simoun an iya masubó nga kaagi, nga naunano, ha may napulo katuig anay, han iya paghibalik tikang ha Europa, tugób hin mga paglaom ngan mga maglipayon nga inóp, inmuli basi pumakasál hin usa nga batan'on nga iya hinihigugma, an tuyo amo an pagbuhat han kaupayan ngan pagpasaylo hadton namagbuhat ha iya hin maraot, tubangan pabay'an hiya ha mamingaw nga kaukóy. Waray iní matuman. Usá nga kamót nga dimatukib nagtikwang ha iya ngadto hin usá nga pagribók nga gintukod han iya mga kaaway: ngatanan, bahandi, higugma, kabubwason, pag-ugaring, ngatanán nakarag, ngan nabawi lugaring ha kamatayon salamat han talinguha panabag hin usá nga sangkay. Katapos hini nagsumpa hin pagbulós. Tungód han manggad han iya pamilya nga nahalulubóng ha kagurangan, kinmalagiw, napakadto ha lain nga tuna ngan inmatubang ha pag- komersyo. Inmirog didto han away ha Cuba, binmulig hin usa nga partido, katapos ha luyó na man, kundi unob nagdadaóg. Didto niya igkakilala an Heneral nga hadto ko-mandante, nga iya nakuha ha kaburut'on tungód hin mga pauna nga salapi ngan unina iginkasangkay salamat hin mga pagtalapas nga an alahero la in maaram. Tungód han salapí nahimo niya nga say matungdan pagkanhi ha Pilipinas, ngan han nakanhi na iya ginamit nga hingani-
