ban ngan iya nahimo nga magbuhat han ngatanan nga
panamastamas dara han waray sukol niya nga kamakisalapi.
An pagkumpisal halaba ngan mahinay, kundi hamtang nagpipinamati han kompesyon an padi waray balik pagpakita hin paghipausa ngan talagsa na la sumagbang han masakit. Gab-i na nga hi P. Florentino, namahid han balhas ha nawong, tinmadong paglingkod ngan manhunahuna. Say naguop han sulod in kasirom nga tiriguhon kay an mga silaw han bulan nga nasulhog ha tangbuanan nahatag hin madaparap nga pawa nga daw nagbuburong nga silaw.
Ha butnga han kamingaw an tingog han padi nadungog nga masubo, mahinay kundi makaliliaw:
—An Dios nagpapasaylo ha imo, senyor... Simoun,— nagsiring;—maaram nga kita masinalaypon, nakakita han imo gin-antos, ngan han pagtugot nga ikaw kumarawat hin sirot han imo mga sala, nga dinangat mo an kamatayon dida ha kamot han mga tawo nga imo ngahaw ginaghat, kinikita naton an Iya dayon nga pagkaluoy! hiya an nagpurak patag-usa han imo mga paagi, an labi kamag-upay nga kaandam, siyahan tungod han pagkamatay ni Maria Clara, sunod, dara hin kakulang hin kaandaman, waray la sabuta.... Tahuron ta an Iya kaburut’on ngan magpasalamat kita!
—Sugad han imo siring,—binmaton hin maluya nga tingog an masakit,—iya karuyag nga ini nga mga puro...
—Magpadayon anay dida han kamutangan nga ira gin-aantos?—tinapos han klerigo an pakiana han pakakita nga an usa inmukoy. —Ambot, senyor; diri ko nababasa an panhunahuna han Dimatukib! Maaram ako nga wa ray talikdi an mga bungto nga ha uras han kasuruk’an sinmarig ha Iya ngan ginhimo Hiya nga Hukom han pagtalumpigos ha ira; maaram ako nga an Iya butkon waray iliwa ha mga panahon nga, hamtang gintatamakan an katadungan ngan waray na iniisulan, an ginlulupig nahulbot han sundang ngan nangangaway tungod han iya balay, han iya asawa, han iya mga anak, han iya mga ka tadungan nga diri maparalit nga, siring han pulong hin usa nga aleman nga magsiriday, nasanag hin dimaparong ug dimariwa didto ha kahitas’an sugad han dayon nga kabitun’an. Diri; an Dios nga amo an pagkamatadong, diri matalikod han Iya causa nga amo an causa han katal-
