nagiginkabulig kitá han mga bisyo, usahay dinadayaw ta; salit angay gud nga mag-antos man an aton mga anak. Amo an Dios han katalwasan, senyor Simoun, nga nagsusugo nga higugmaón ta didá ha pagdará han mabug-at nga pagkauripon; usa nga Dios ha pagkaluoy, ha pagkatupong, nga hamtang ha aton nasirot naghihingayad man ha aton, ngan nagawad la hin kahimyangan hadton na magpakatakós didá han ira mga panalinguha; an liburán han pag-antos napadig-on, an patag han pag-awayan napabaskog han kalag. Diri ko karuyag sidngon nga bawion ta an aton katalwasan didá ha katadman han hinganibán; an hinganiban kulang hin gamit didá han kinabag-o nga panhunahuna, kundi, matuod itó, aton babawion ha pagpakatakós, ha pagpahayaw han katadungan ngan dungóg han tagsa katawo, ha paghigugma han matadong, han maupay, han pagkadako tubtob ha pagpakamatay tungód hini nga talinguha, ngan kun in usa nga bungto nasangpot na hito nga kahitas'an, an Dios an nagawad han hinganibán, ngan napupukan an mga diyusdiyos, natutumba an mga maglupig daw balaybalay nga papel, nga nasirang an katalwasan han pagbunias han adlaw! An aton karat'an dinhi ta kukuhaa ha aton ngahaw, ayaw ta ighaklin ha ibá. Kun an España kumita ha aton nga diri na kitá uraura nga natubyan han mga magraugdaog ngan andam kitá hin pangaway ngan pag-ilob han kakurian tungód han aton mga katadungan, an España ngahaw asya an siyahan nga magawad ha aton han katalwasan, kay kun an bunga nga iginpanamkon naabót na ha pagkahinóg, makaluluoy an iroy nga maghunahuna hin paglumós ha iya! Hamtang an bungto nga pilipinhon waray pa takós nga kusóg ha pagguliat, hangad an agtang ngan bukas. an dughan, han iya katadungan ha pag-ukóy ha sakób han pagkatarampo ngan padig-unán han iya pagpahaunong, han iya ngahaw dugó; hamtang kikitaon ta an aton kasitaghimungto nga kun hirá la nabati hin kaalo, nadungóg han tingog han kasingkasing nga nariwa, nasupil, kundi ha atubangan han bungto naukóy la, nasabát han nagpapahusa basi makagdurugas han ginpahusaan; hamtang kikitaon ta nga magpapadayon la han batasan nga iyaiya ngan magdadayaw hin pinirit nga tawá han mga buhat nga tuwad, makikilimós han paniplat nga bahinán han tinikas, anó in pagtagi hin katalwasan? Ma-España o madiri España amo la gihapon an aabután o bangin, ba-
