ngin ngani labáw pa kamaraot! Anó in pulós han paglugaring kun an mga uripon yaná amo liwát an mananag-garong buwás? Ngan amo manta in aabután: an nahiara hin kauripon hagugugma hin pag-uripon, Senyor Simoun, hamtang an aton bungto diri pa andam, hamtang mapakadto ha away lilimbungan la o igintitikwang, waray kalibutan han iya bubuhaton, maghuhul-os an labi kaandam nga talinguha ngan gabáy maghul-os, kay anó nga idudulong ta ngadto han kapadis an asawa nga diri niya hinihigugma hin tukib, kun diri pa hiya andam hin pagpakamatay tungód ha iya?2
Hi P. Florentino, inmabat nga kinaptan hiyá han masakit didá ha kamót ngan ginugumos; hinmunong hiya ngan humulát nga magyakan, kundi ginumos la an iya kamót nakaduhá pa, binati niya in usa nga haróy ngan sinmunód in halawig nga kamingaw didá han sulód. An dagat la, tungód han iya mga balód nga dinmagko, dará han hangin ha gab-i, nga daw nanhimangno didá han kapasó han adlaw, amo an nagpapabati han iya garhob nga ngurob, han iya kadayunan nga awit kun nalaganak dida han mga kantil nga bató. An bulan. nga diri na binabagi han adlaw, mamingawon, nanlulupig didto ha langit. ngan an kakahuyan didá han kagurangan nanyuyukbo ha ira ngahaw. nagpapasumatsumat ha surupaton nga huring-huring, han ira hadto pa nga mga tinuuhan nga gindadará han hangin didá han iya mga pakó.
Han pagkita nga an masakit waray pagyayakán, hi P. Florentino, nalilibáng han iya mga panhunahuna, nag- siring:
-Hain na an mga batan'on nga maghahalad han ira limbaon nga panahón, han ira mga inóp ug mga kasindak ha kaupayan han ira tuna nga natawhan? Hain na an magbibisibis han ira mahigugmaon nga dugó nga ighuhugas han mga kaarawdan, han mga pagtalapas, han mga panampalas? Kinahanglan nga uray ngan waray dum-it an magpapahaunong basi an pag-ula magintakós karaw- ton.... Hain na kamó, mga batan'on, nga magdadará han kabakod nga inmiwas na didí ha amon mga ugát, han uray nga panhunahuna nga nadum-itán didí ha amon utok, ngan han kalayo han kasindak nga naparong na didí ha amon kasingkasing?... Ginhuhulát kamó namon!
Ngan tungod kay inmabat nga naghuhulós an iya mga matá, ibinutang an iya kamót didá han kanán masa-
