kit, binmuhat ngan dinmaop ngadto ha tangbuanan kay
buot magkita han dagat nga kahaluagan. Nahamangno
hiya dida han iya panmurubuot han pakabati hin hinay
nga mga tuktok didd han purtahan. Amo an suruguon
nga napakiana kun angay na magparukot han suga.
Han pagdaop han padi ngadto han masakit ngan han pagkita hini, ha kapaw’an han suga, nga waray pagkikiwa, napiyong, an kamot nga naggumos han iya nabubuklad ha ligid han higdaan, nakasiring anay nadaliay nga nakaturog; kundi han pag-abat nga waray paggiginhawa, iya sinapingan hin mahinay ngan amo na in pagsabot nga patay na: nagtitikang na panhagkot.
Dida hini, linmuhod ngan mangadi. Han pagbuhat nagkinita anay han minatay ngan han pakakita nga ha kahimo nababasa in kasubo nga abot pa ha unhan han kamatayon, an tigurang nabantad ngan namulong:
—Kaluuyan sa Dios adton namagbaliko han iya dalan.
Ngan hamtang an mga suruguon, nga iya gintawag, nagkakaluhod ngan nangangadi tungod han minatay, nga nanhihipahungat namamagkinita ngadto han higdaan ngan namamagliniwatliwat han mga requiem nga nagsusunudsunod, kinuha ni P. Florentino didto hin usa nga sang-atan an sangyaw nga maleta nga puthaw nga sinusudlan han bantugan nga bahandi ni Simoun. Inmuruon mausa kadali; kundi ha gilayon tinmuron, linmusad han mga balitangan, dara an maleta, ngan napakadto han bato nga danay lingkuran ni Isagani pagtinamod han sag-od han dagat.
Hi P. Florentino naniplat ha ubos han iya mga tiil. Didto ha ubos kinikita an mag-itom nga balod han Pacifico nga naglalabnas han mga kalungagan han bato, nga nadarahig hin maaringasa nga dalugdog, dungan an paggimlat han mga balod ug mga bura kay sinisilawan han bulan baga in nagtatalbo nga agpod, baga in mga brilyante nga iginsasaburak hin usa nga genio nga nautwal tikang ha kahiladman. Naniplat hiya hin palibot. Uusa la hiya. An mamingaw nga baybayon nawawara didto ha hirayo daw sugad hin burong nga pinapara han bulan didto ha kasidsiran. An kagurangan nagnginginurutob hin diri hinsasabutan. An tigurang dida hini, dara han kusog han magbakod nga mga butkon, linmabog han maleta ngadto
