nga guti, ngan tungod kay waray kakukuha ha paniplat an mapula nga dag-om, nagsiring nga itutubyan niya adto nga iya kaumhan han tawo nga siyahan magbaribi didto han iya dugo nga nabiaw han iya mga ugat.
An tigurang nga Selo, han pagkita han kahimo han iya anak, waray na paghinabi han buaya, kundi nagipagsaragdon gihapon ngan ginhimangrawan han mga daba nga tuna ngan ginpahanumdom nga dida hin usa nga kalipungan an nagdadaog nawawarayan bado.
—Mabalik kita ha tapotapo, itay, ngan waray kita bado nga matawo!—binmaton. Ngan tibway nagdumiri gud hin pagbayad ngan hin paghatag bisan usa kadangaw han iya mga tuna kun diri anay an mga prayle magpakita hin bisan ano nga karig-unan nga pangilal’an han ira totoo nga pagkatagiya. Ngan tungod nga an mga prayle waray karig-unan, namay-kalipungan, ngan hi Ginhaupan Tales inmalagad kay may iya pagmatuod nga, bisan diri ubos, may ada na gihapon mahagugugma han pagkamatadong ngan han pagtahod han mga balaod.
—Nag-alagad ako ngan nag-aalagad ako han hadi, ha sakob hin kadam’an nga tuig, han akon salapi ngan han akon kabudlay,—nasiring hiya han mga namamaghinulop ha iya;—yana nangangaro ako nga igawad an pagkamatadong, ngan kinahanglan igawad ha akon!
Ngan kay igintitikwang han maraot nga palad ngan daw sugad hin ipinusta niya dida han kalipungan ngatanan an iya kabubwason ngan han kanan iya mga anak, gin-ginasto niya an iya hinipos dida ha pamayad hin mga abogado, mga eskribano ngan mga prokurador, labot la han mga opisyales ngan mga eskribyente nga namamagpahimulos dida han iya kakulang hin pagsabot ngan han iya pagkasugad. Nagbibinalikbalik hiya ngadto ha kabesera ngan waray kaunkaon tagpira kaadlaw ngan tagpira kagab-i nga waray karukaturog, ngan an iya la himangrawon puro mga escritos, presentation, apelacion ug iba pa. Kinita na man gud in away nga waray pa hikit’i dlnhi ha sirong han langit ha Pilipinas: an kanan usa nga makaluluoy nga indiyo, tapang ngan waray kasangkayan, nga natapod la han iya katadungan ug han kamaupay han iya causa, nga nangangaway kontra hin usa nga makagagahom nga gayod nga katiguban, nga ha iya atubangan an pagkamatadong natungok, an mga hukom nabul-iw han timbangan ngan
