nahananabi han kan Basilio maupay nga pagtuon. Kundi an sunod nga tuig diri naabot, say lugod naab6t an bag-o nga pagpadugang han taragan han tuna; hi Ginhaupan Tales nahapapaukoy, waray tawatawa, ngan magkinalot han ulo. An daba natubyan na la han iya bugas ha kaldero.
Han pag-abot na han taragan han tuna hin duha kagatos kapisos, hi Ginhaupan Tales waray na ilob hin pagkinalot la han ulo: nagmugo ngan nagnginurutob. An prayle nga magmarangno nagsiring nga kun diri liiya hadto makakabayad, iba in mag-uuma hadto nga mga tuna. Damo an naiipa ngan namamagpasabot han ira karuyag.
Hi Ginhaupan Tales nakasiring nga an prayle nagiinintrimis, kundi an prayle naungud-ungod ngan tinmudlok ngadto hin usa katawo, usa han iya mga suruguon, nga say kuno matulos han tuna. An sadang pairan nga tawo iginpamurud-as, nanhuni an iya mga durunggan, may mapula nga dampog nga sinmalipod han iya mga mata ngan dida iya kinita an iya asawa ngan han iya anak nga daraga, nga mga duason, nanhihingas, namamaghingutas, nanhiunong han hiranat nga luukluok. Ngan sunod iya nakikita an masighot nga kagurangan nga nagin-uma, nakikita niya an naglalasaw nga balhas nga say nagtutubig han mga inarado ngan nakikita niya hiya ngahaw, an makaluluoy nga Tales, nga nag-aarado ha butnga han sirak, nag-uupos han iya mga till han panhipakdol dida han mga bato ug mga suranggat, hamtang adto nga lego nagsisinakaysakay la han iya kotse, ngan adto nga tawo nga manununod ha iya nabunyog ha luyo han iya agaron nga naguuripon. Ah, diri! Usa kayukot nga diri! Gabay ilunod anay adto nga mga uma ngadto ha ilarom han tuna ngan manhilubong hira ngatanan. Hino hiya nga taga iba nga tuna nga makakagtag-iya hadto nga mga kaumhan? Han iya pagkanhi tikang didto ha ira, na may dara niya bisan na man la usa kapurot hadto nga tapotapo? Napilo ba in usa niya nga tudlo ha paggabot bisan usa la nga gamot han kadam’an nga nagpapahutpahot dida ha tuna?
Dara han kangalas tungod han mga panhulga han prayle nga karuyag say magbuot ha iya hin pinirit dida ha atubangan han iba nga mga saop, hi Ginhaupan Tales inmato, waray tumangdo pagbayad bisan mausa
