—Kinahanglan magbantay ako han akon mga tanom,—-nabaton la;—tagsa kapuno nga tubo nga tumubo dida hito nga uma tulan han akon asawa.
Ginkuhaan han sundang kay uraura kuno kahalaba. Say na man liwat niya ginamon an daan nga parakoi ni iya itay ngan say pagpinarupas-anon dida han iya makababaraka nga sudoy.
Ikinapaglusad niya dida han ira balay, hi Tandang Selo ngan hi Juli ikinukurog hin kahadlok nga may mahanabo ha iya. An daraga nabuhat dida han iya hablon, napakadto ha tangbuanan, nangangamuyo, nananaad han mga santos, nangangadi hin mga nobena. An apoy usahay danay diri mahabaro pagtima han baklaw han silhig ngan dayon pagluluwas hin pag-ibaralik pag-ukoy didto ha kagurangan. An kaukoy han mga tawo ha sakob hadto nga panimalay naghihimakuri.
Ha katapusan, nahanabo na ngahaw an ira ginkikinahadlukan. Tungod kay an uma harayo hin kabalayan, hi Ginhaupan Tales, bisan may gamon nga oarakol, hinsakban han mga tulisan kay may mga rebolber ngan mga pusil. An mga tulisan nagsiring ha iya nga, kay may ada man hiya salapi nga ibinabayad han mga abogado, kinahanglan mamay-ada man liwat para han mga darakpon ngan mga baya nga tawo. Tungod hini gin-aruan hiya hin lima kagatos kapisos nga lukat ha iya nga iginpaagi ha usa nga taga huron nga sinugo, ngan ginsiring nga kun ano in mahanabo han sinugo pagbabaydan han binihag han iya kinabubi. Tinagan hin duha kaadlaw nga talaan.
An hinabo nakahatag han iya panimalay hin dako nga kabaraka labi na han paghibarul nga an Guardia Civil magawas pagbiling han mga tulisan. Kun mamayada kirigta, an siyahan nga hauunong amo an dinakop, sayod hini an ngatanan. An tigurang nawad’an hin gahom pakakiwa ngan an anak nga daraga, ginpupurudas ngan ikinukurog han kalisang; nag-ipagyayakan nakadamo kundi waray pakahimo. Kundi an labi kamakalilisang nga panhunahuna, usa nga mapintas. nga mahananabo, amo an nagsangpit han iya paghipaudong. An hurunanon nga sinugo han mga tulisan nagsiring nga tingali an kapangon mapahirayo, ngan kun ihaon nira hin duro an paghatag ha iya han lukat mahahagos an duha kaadlaw ngan hi Ginhaupan Tales bangin patayon.
