tingali katalagibay, ginngangaranan nga Noel didto ha Europa, ngan marakyahon ug malipayon.
—Ha panahon han mga santos,—nagpipinamurubuot an kotsero,—waray gud ada Guardia Civil, kay diri mapahilawig han kinabuhi an mga dabal hin kulata hin pusil.
Sunod han tigurang, inmagi an Tulo nga Hadi nga mga sakay hin kabayo nga namamaglunti, labi na an kanan hadi nga agta, hi Melchor, nga haros tutudulon an kanan iya kaupdanan.
—Waray gud, waray gud hadto mga sibil,—nagmamatuod an kotsero nga nawiwili ha sakob han iya kasingkasing hadto nga magiipayon nga mga panahon;— kay kun may ada, ito nga agta nga nagpapasipara hiton iya sarakyan pag-intrimis hiton duduha nga katsila (hi Gaspar ngan hi Baltazar) nabilanggo na.
Ngan han pakapanginano nga an negro may kuruna ngan hadi man liwat, sugad han duduha nga katsila, kaiya nga nakapanhunahuna han hadi han mga indiyo ngan nanhayhay.
—Maaram ka, senyor,—nagpakiana hin matinahuron kan Basilio,—kun an too nga till nahubaran na?
—Kanay too nga tiil?
—Kanan hadi,—binmaton an kotsero hin hamubo ngan urusahon kaupay nga tingog.
—Ano nga hadi?
—An aton hadi, an hadi han mga indiyo. Hi Basilio nahapahiyom ngan pinmakuro han sugbong.
An kotsero binmalik panhayhay. An mga indiyo ha kahurunan nagtitipig hin usa nga gintutuuhan nga susumaton nga an ira hadi aadto nabibilanggo, kinadinahan, didto ha lungib ha San Mateo, maulpot mga sano nga adlaw ha pagtalwas ha ira dida ha pagkauripon ug panalumpigos. Ikinausa kagatos katuig nauutod in usa han iya mga talikara, ngan yana bulu na an duduha nga kamot ngan han tiil nga wala, an tiil na la nga too an hinigtan pa. Ini nga hadi amo an tinikangan han mga linog dida kun nagios o nangungusog pag-imakabubuhian; ngan makusog nga uraura nga kun iginkakakamot say idinuduhol ha iya in usa nga tulan nga paghihikapti niya gilayon nadudugmok ha iya mga tudlo. Hin waray nakakaghatag hin kasayuran kun ano, gin ngangaranan hiya han mga indiyo nga Hadi Bernardo,
