tingali iginkakalisa kan Bernardo del Carpio.2
—Makabuhi ngani iton too nga tiil,—namulong an kotsero pinugngan in usa nga panhayhay,—ihahatag ko ha iya inin akon mga kabayo, mapasugo ako ha iya ngan ilob ako hin kamatay. Hiya an magtatalwas ha aton dida hinin mga sibil.
Ngan ginlanat niya hin kita an tulo nga Hadi hin mabiduon nga mga mata.
Nasunod in duduha karumbay nga kabataan, magsamdong, himuot, baga mga pinirit. May mga dara nga tiwak, may nagpapakabitbit hin agupit, an iba kandila, an iba mga parol nga papel nga tinukod hin kawayan, nagpapangadi han rosaryo hin dagko nga tingog daw sugad hin igin-aaraway. Nahasusunod ha ira hi San Jose, pinasag ha bastos la nga andas, an iya nawong kanan mainantuson ngan mabiduon, may talugkod nga bukaran hin mga asusinas, ginbubutnga hin duduha nga guwardiya sibil, baga an dinakop: yana sinmabot an kotsero han masamdong nga dagway han santo. Ngan tungod ada kay nakalisang ha iya an pakasiplat han mga sibil, o kakulang ba hin pagtahod han santo nga inuupdan hin mga sibil, waray hiya pangadi bisan na man la usa nga requiem eternam. Ha luyo ni San Jose bunyog an kabataan nga kababayin’an nga may mga tiwdk, tinabunan an mga ulo hin panyo nga binalighot ha sulang, nagpapangadi man liwat han rosaryo bisan kun an ira tingog diri kanan igin-aaraway sugad han kalalakin’an. Ha butnga may pipira hini ha ira nga namamagdanas hin koneho nga papel dehapon, nga sinugaan hin gudtiay nga kandila nga pula, natindog an mga ikog nga papel nga ginuntingan. An kalalakm’an nga kabataan nabunyog han prosesyon dara ito nga mga uyagan basi pagparugyaw han gab-i han pagkatawo han Mesias. Ngan an mga marumananapay magtambok, maglison baga in bunay, baga maglipayon kay nahumamok la magkalukso, nanhihibakinas, nagkakatutumba ngan nagkakasusunog; an tag-iya nadaop pagparong hadto nga mga laga, nahuyop, naghuhuyop, pinaparong an paglalarab kay gindadagpas, ngan han pakakakita nga nabungkag an uyagan nahamok la magtuok. An kotsero nagkikinita hin may lakip nga kasamdong tungod nga an tulin han mga mananap nga papel nagtitikaiban ikinatuig daw sugad hin inaalap man liwat han peste
