Hi Basilio nga nahadlok nga hibatitawan, nagtibway pagpakita, binmuhat dida han iya pinupungkuan ngan ha kinaiya nga tingog:
—Makahimo ako pagbulig ha imo, senyor?—nagpakiana hamtang nagawas didto han iya tinataguan. Hi Simoun tinmindog ngan linmukso daw an tigre nga pinakalasan pangaway, kinmuot han hupaw han bado ngan magkinulaw han magturuon, nanmumusag ngan hangit.
—May napulo na kagtulo katuig imo ako binuligan, senyor,—nagpadayon hi Basilio hin waray kaalantad;— dida hint nga daplin kay ikaw an naglubong han akon nanay, ngan ikafilipay ko an pakabulig ha imo yana. Hi Simoun, nga waray bubulag hin kita han batan’on, hinmukad hin rebolber. Hinbatian in lagatik hin pagkatultog hin puthaw.
—Kay an imo hunahuna hino ako?—namulong, inmisol hin duha kapitad.
—Ha akon usa ka nga marahalon nga tawo,—binmaton hi Basilio, dapit na may kakulba kay bangin adto katapusan na han iya kinabuhi.—Ngatanan nasiring nga patay ka na; ako in waray pagmatuod ngan ikinasasakit ko ha gihapon an imo mga nasugaran. Hini nga mga pulong sinmunod in kamamingaw nga makakurulba, kamingaw nga ha hunahuna han batan’on daw an ha kadayunan. Kundi hi Simoun, katapos hin halawig nga pag-alang, dinmaop ngan dun’an hiya dida ha sugbong, namulong hin nakurog nga tingog:
—Basilio, may hinbabaruan ka nga akon tinago nga makakadaot ha akon, ngan yana imo na liwat ako hmabatan hin lain liwat nga tinago nga ha akon nakakagapos ha imo mga kamot, ngan kun mahasangyaw makakabungkag hiton akon mga gintutuyo. Basi mawaray ko kahadlukan ngan mamay-kasayunan inin akon mga gintutyo, angay ko iton imo baba tabunan hin dayon, kay ano in bali hin usa nga kinabuhi basi ha pagtuman hinin akon mga panuyo? May kasayunan inin higayon, waray maaram nga napakanhl ako, may ada ko hinganiban, ikaw waray; an imo kamatayon mahipapasangil han mga tulisan, kun diri man, ha iba nga hinungdan nga nahatutungod ha mga urusahon... kundi, bisan la, diri ko ikaw papatayon ngan natapod ako nga diri ko ini pagbabasulan. Ikaw nagkabudlay, nagguol hin waray hingan... ngan, sugad ha akon, may ada mo man liwat
