hupot han iyo kalugaringon, ngan kamo man liwat, bungto nga katingalahan ha sakob hin Pamunuan nga diri tuuron, hi kamo nagtatalinguha hin kakuhai han pagkanasudnon. Kamo ngan han iyo Pamunuan magkasi kamo nanhihingalimot nga hamtang in usa nga bungto nagtitipig han iya lugaringon nga pinulungan nagtitipig manta han iya kagawasan, sugad man an tawo may kalugaringon nga pagburut’an hamtang naglulugaring han iya panhunahuna. An yinaknan amo an panhunahuna han mga bungto. Maupay na la kay an iyo paglugaring han iyo pinulungan madig-on an kamutangan kay ginbabantayan han mga pagkahakog han tawo!...
Hinmunong hi Simoun ngan ihinapyod ha agtang an iya kamot. Nasirang gud hadto nga uras an bulan ngan an dan-ag han maarupaop nga pawa han pakatingalon nga bulan nasulhog dida han mga katal-angan han mga sanga. Tungod han iya mabusag nga buhok ngan han iya kahimo nga nangingisog, ngan pinapawaan han iya flashlight tikang ha till tipaigbaw, an alahero baga makaharadlok nga kalag han kagurangan nga may gin-iisip nga maraot. Hi Basilio nagpipinamati hin mahilom hadto nga makalilisang nga mga buyboy, naniniid kan Simoun, natungok han ulo. Hi Simoun nagpadayon:
—Hinsabutan ko an pagtikang hito nga iyo pitad ngan nag-inagma ako hin bug-os nga gab-i tungod hin kasakit kay maaram ako nga dida hiton iyo ihap may mga kasingkasing ngan sarabutan nga labaw nga nagpapahaunong tungod hin usa nga talinguha nga ira iniisip nga tultol, balitaw nag-uunay la hira pagpapakaraot han ira tuna!... Nakapira la ako paghunahuna hin pagdaop ha iyo, pagpakita ha iyo kun hino ako ngan pag-asoy han kamatuuran! Kundi, tungod hinin akon bantog, an akon mga pulong pakakasidngon niyo nga may lain nga tuyo, ngan maghihikaraot lugod... Nakapira la ako pag-idaraop hiton iyo Makaraig, hiton iyo Isagani! Usahay danay ako makahunahuna hin pagpatay, pagrungkab ha iyo...
Inmukoy hi Simoun.
—Amo ini an hinungdan kay ano nga binubuhi ko ikaw, Basilio, ngan natagya ako nga ha usa kadiri paghirot na usa kaadlaw imo ako igsusumbong... Yana maaram ka kun hino ako, maaram ka han dako ko nga
