—Kun ako hihimuon ko ito nga hinumduman... An nagpakakita kan Maria Clara didto ha kombento namagsiring nga magasaay kuno, uraura kamagasa nganira, nga bangin mamatay sugad hin santa... Hi P. Salvi nagdidinayaw ha iya kay amo an kumpisalan... Amo ito an diri paggastuha ni Juli, saiit ginmapil na la ha pagpasugo.
An sagdon nagdaog.
An pagdumdom han iya anak amo an nakaulang kan Ginhaupan Tales.
—Kun tutugutan mo ako,— nagsiring; —matugbong ako pagpakiana hiton akon anak; diri pa magsisirom. hahani na ako liwat.
Nagkauyon hira dida hini ngan hi Ginhaupan Tales linmusad day on.
Kundi han paghigawas han baryo hinkit’an niya. harayo pa, didto hin usa nga dalan nga natadong ngadto ha kagurangan, an prayle nga mag-uruma upod in usa nga tawo nga iya kinikilala nga amo an nakadara han iya mga tuna. Usa nga bana nga nakakita han iya asawa nga nasulod ha usa nga higdaan kaupod hin iba nga lalaki, diri masisina ngan mangangabugho sugad han kasina ug pangabugho nga dinmangop kan Ginhaupan Tales han pakakita hadto ngaduha nga nagtitikadto han iya mga tuna, han mga tuna nga iya ginkabudlayan ngan ginlauman nga iya mahabibilin han iya mga anak. Nakasiring hiya nga adto ngaduha nagtitinawa, nanhihikalipay han kawaray niya nahimo; asay niya hinnunumduman an iya mga pulong: “Diri ko itutubyan kun diri hadton tawo nga magbisibis dinhi han iya dugo ngan maglubong dinhi han iya asawa ngan iya andk nga daraga”....
Inmukoy hiya, hinmapyod han iya agtang ngan pinmiyong han mga mata; han pagpukrat niya liwat iya kinita nga an tawo naglulubag hin tawa ngan nagdidinuon han tiyan nga diri magbuto han dako nga kalipay, ngan iya hinkit’an nga nagtitinudlok ngadto han iya balay ngan dagos babalik pagtinawa.
Nag-aningal in tingog ha iya mga talinga, binati niya ha mga alunggigising an paglapirit hin latigo, binmalik an mapula nga dampog pagbutho ha iya mga mata, binalik niya paghikit’i an mga minatay han iya asawa ug anak nga didto nahatutupad an tawo ug an prayle nga namamagtinawa, namamagdinuon han hawak.
