Hi Ginhaupan Tales nagsiring nga an mga alahas han iya anak nanhibaligya na ngan say na la nahabibilin an waray mga data.
—An relikaryo ni Maria Clara? — nagpakiana hi Sinang.
—Matuod ito!— nagyakan an amay. Ngan ha usa kadali nag-inggat an iya mga mata.
—Relikaryo adto nga may mga brilyante ngan mga esmeralda, —nagsumat hi Sinang han alahero; — gingiginamit adto han akon sangkay han waray pa susulod pagkamongha.
Hi Simoun waray bumaton; say ginsisinunod han iniirasan niya nga paniplat hi Ginhaupan Tales.
Katima pagpinangukab hin pira nga pirit’an hinagian an alahas. Ginkinita ni Simoun hin tutok, ginbitad ngan kinidyom nakadamo; amo adto an relikaryo nga dara ni Maria Clara didto han pagpatron ha San Diego ngan ha usa kadali nga pag-alpi hin kaluoy ihinatag ha usa nga sanlahon.
—Naruruyagan ko inin kahimo,— nagsiring hi Simoun;— pira in imo karuyag hint? Hi Ginhaupan Tales kinmalot han ulo nagugupong, katima magbiningbing han talinga ngan sumiplat han kababayin’an.
—Nabibihag ako hito nga relikaryo,— nagsiring liwat hi Simoun. —Karuyag mo in usa kagatos... lima kagatos? Karuyag mo igbalyo hin iba? Pili han imo karuyag.
Hi Ginhaupan Tales waray hin tingol nga nagkinikita, daw lurong, han Simoun sugad hin may pagruhaduha han iya nadudungog.
—Lima kagatos kapisos?— nagngurob.
—Lima kagatos,— nagsiring an alahero hin tingog nga naalantad.
—Hi Ginhaupan Tales pinmurot han relikaryo ngan pagbinidbiron; an iya mga alunggigising nagpuputok hin malaksi, an iya mga kamot nangungurog. Kun umaro hiya hin darudako? Adto nga relikaryo makakatalwas ha ira: maupay adto nga higayon ngan din na igkikita liwat.
Ngatanan an kababayin’an namamagkininhaton basi niya igbaligya; hi Penchang in waray bubulig kay dard han paghirot nga lukaton hi Juli, nagsiring la hin kanan makidiyos nga sagdon:
