—-Waray ko kabilinggan,— binmaton hi Simoun nagpipinamadpad hin tisa nga nakakaluob han iya mga kamot; —ngan kamo, ano man an iyo ipupusta?
—Ano amon ipupusta?— binmaton hi P. Sibyla.
—An Heneral makakapusta han iya karuyag, kundi kami, an magpakidiyos nga kapadian....
—Bah!— sinalo ni Simoun hin liparo; —ikaw ngan hi P. Irene magbabayad kamo hin mga buhat ha kaluoy, pangadion, mga buhat nga susgaranan, eh?
—Maaram ka nga an mga buhat nga darayawon nga magiginkanan usa nga tawo,— nakikilantugi hi P. Sibyla, —diri sugad han mga brilyante nga magkakabarubalhin hin kamot, mahababaligya hin makadamo, nahunong dida han tag-iya, bahin han mga kasugaran han tawo....
—Ilob ako nga iyo ako bayaran hin baba la,— binmaton hi Simoun, malipayon; —ikaw, P. Sibyla, kun may baraydan mo ha akon nga lilima nga tantos, masiring ka la pananglit: “Ha sakob hin lilima kaadlaw matalikod ako han pagkakablas, han pagpaubos, han pagsugot”..., ikaw, P. Irene: “Mabaya ako han pagkauray, han katarugkaya”, ug iba pa. Nakita kamo nga gutiay la akon inaaro, ngan ako mabutang hin mga brilyante.
—Kaurusahon hini ni Simoun nga tawo, kalunlon hinnunumduman!— nagsiring hi P. Irene, nagtitinawa.
—Ngan ini,— nagpadayon hi Simoun, dinun’an ha sugbong hi Su Excelencia, dara han pagkasangkay nga hinasa, —ini magbabayad han lima nga tantos hin usa nga bali hin kanan lima kaadlaw ha bilangguan; usa nga solo, lima kabulan; usa nga codillo, usa nga sugo hin paghalin nga purun’an pa an mahatutungod kun pipira kaadlaw; usa nga bola... usa nga pagpusil hin tibway han Guardia Civil hin usa nga tawo hamtang igindudulong ngadto hin usa nga bugto, ug iba pa.
Talagsa igkita in sugad nga huygo. An tutulo nga nagkikinalakat nanaop.
—Kundi, Sr. Simoun,— nagpakiana an hataas in katungdanan; —ano in makukuha mo dida ha mag-upay nga buhat ha baba la ngan ha panhalin ngan han tibway nga pamusil hin tawo?
—Ada, damo! Ginul’an na ako pagpinamati hin mag-upay nga gawi ngan karuyag ko hikaptan ngatanan, ngatanan an bahani ha kalibutan, ngan isulod
