—Ano man ito nga imo nahuhunahunaan?
—Kun matuod ito nga an mga katoliko la an nababawi, ngan lilima man la ngani ha ikinagatos, sugad han pulong han kadam’an nga kapadian, ngan inin mga kato liko ikanapulo la kagduha kabahin han ngatanan nga umurukoy hinin kalibutan, kun daw tutuuron ta an mga sinurat mahatungod hini nga bahin, makauuwo kaupay nga, katima bin pagkabibilanggo hin kayukutyukutan na nga mga kalag tikang hadton gimaiihai na nga mga tuig nga namaglabay tubtob ngada han pag-abot han Manunubos ha kali butan, ngan katima liwat kamatay hin usa nga anak sa Dios tungod ha aton, yana lilima la in matatalwas ha ikinayukot duha kagatos katawo? Dios ko, diri gad man! Gabay ko say pagtundugon hi Job: “Diri ka mapaid hin usa nga dahon nga naglulupadlupad, ngan imo pagbubukuron in usa nga mamara nga kagingking?” Diri! an sugad hito kadako nga karat’an diri mahihimo; an pagmatuod hito usa nga panampalas; diri, diri!
—Kay ano man imo karuyag? An Pagkamatadong, an Pagkauray nga Diyosnon . . .
—Oo, kundi an Pagkamatadong ngan an Pagkauray nga Diyosnon nagtatan-aw han kabubwason ugsa maglarang han kalibutan! — binmaton an lagas nga binmuhat dida han iya linilingkuran, nga nakibig. —Dida han paglarang han kalibutan an tawo diri usa nga binuhi nga kinahanglanon gud, waray pagpapamulata, ngan ito nga Dios diri unta angay maglarang han tawo, diri unta, kun amo na man la nga basi maghimaya in usa mahuhulog in tinaggatos ha dayon nga karautan, ngan tungod la hin sala nga pinanunod, sala nga nabuhat ha usa kadali. Diri nga gayod! Kun asya ito, pitluka iton imo anak nga aada nakaturog; kun ito nga tinuuhan diri panampalas patok hito nga Dios nga amo unta an Gilalabawi nga Kamaupay, an Molok han mga taga Phenicia nga say ayon an mga halad nga mga pinatay nga tawo, nga say ayon nga halad an dugo han mga waray sala, ngan didto ha iya tungod pinanunubod an mga bata nga pinanrabot ha dughan han ira mga iroy, adto nga diyos nga makidugo, adto nga diyos nga makangingirhat, kun itanding ha iya, magigin-usa nga maluyahay nga daraga . . . usa nga sangkay, magigin-usa nga iroy han katawuhan. Ngan duro an kangirhat, an baga buang, baga maki-
