—-Bugtunga iton imo pisi, Crispin! — nagsiring an magurang ha iya manghod.
An manghod kinmalab-itay dida han iya pisi ngan nadungog dayon didto ha igbaw in mahinay nga nguyngoy nga liniga dayon hin usa nga dalugdog nga nagsarang ha usa kayukot nga tingog.
—Hay! kun aadto unta kita ha balay kan inay! — nagmugo an gutiay nagkikinita han iya magurang; — didto diri unta ako mahahadlok.
Waray baton an magurang kay nahamamalanga pagkinita han katunaw han taro ngan dapit may ginpipinamurubuot.
—Didto ha balay waray ha akon masiring nga nangawat ako! — namulong hi Crispin; — diri gud matugot hi inay! Habaro ngani nga ginlamba ako dinhi . . .
Ibinulag han magurang an iya paniplat didto han suga, hinmangadngan kagton hin makusog an iya bahol nga pisi ngan bugtungon hin tigda, nabati dayon in dako nga tunog.
—Hahani na la kita dinhi hin unob nga pag-ukoy, mano? nagpadayon pagyinakan hi Crispin. —Karuyag ko magpakasakitsakit buwas didto ha balay, buot ko masakit ako hin maiha basi ako pagmangnuon ni nanay ngan diri na ako tugutan pagbalik ha kombento! Basi diri na ako dinhi pagngaranan hin kawatan, ngan diri na ako paglambahon. Angay ka man liwat, mano, magpakasakitsakit basi kita magkaupod.
—Ayaw! — binmaton an magurang; —magkakamatay kita ngatanan; hi inay hin kabido, hi kita hin gutom. Hi Crispin waray pagtingol.
—Pipira imo makakarawat hini nga bulan? — nagpakiana katapos hin usa kadali.
—Duduha la kapisos; minultahan ako nakatulo.
—Baydi iton sinisiring nga akon kinawat basi diri na kita pagngaranan hin kawatan. Baydi, mano!
—Tuyaw ka, Crispin? Waray kakaunon hi inay; an sakristan mayor nasiring nga duha nga onsita an nakawat ha iya. Ta, adto nga duha nga onsita makatluan kagduha kapisos.
An manghod nag-ihap dida han iya mga tudlo tubtob han pag-abot ha katluan kagduha.
Unom nga kamot ngan hin duha nga tudlo! ngan tagsa nga tudlo pisos! — nagmiminugo ngan katima namuru-
