buot. —Ngan tagsa nga pisos . . pipira nga dako?
—Uusa kagatos kaunman.
—Uusa kagatos kaunman nga dako? Uusa kagatos kaunman nga dako! Abaa daw, inay! Ngan pipira man in uusa kagatos kaunman?
—Kakatluan kagduha nga kamot! — binmaton an magurang. Hi Crispin nagkinita hin usa kadali han iya gudti nga kamot.
—Kakatluan kagduha nga kamot! — iya gin-iisip-isip; —unom nga kamot ngan duha nga tudlo, ngan tagsa nga tudlo kakatluan kagduha nga kamot . . . ngan tagsa nga tudlo usa ngadako . . . Kadamo nga kuwarta(2) inay! Diri matatapos pag-inihapa hin tulo kaadlaw . . . ngan makakapamalit hin sinilas ha tiil ngan hin kalo ha ulo kun duro nga sirak, ngan hin dako nga payong kun mauran, ngan hin kakaunon, ngan hin imo dugnit ngan hin kan nanay ngan . . .
Hi Crispin nagpinanmurubuot.
—Yana nagbabasol ako nga waray ako pangawat!
—Crispin!— iginmugo han magurang.
—Ayaw kasina! An padi nagsiring nga papatayon ako hin lamba kun diri haulpot iton kuwarta, kun akon ito man gud kinawat mahihimo ko hin paghiuli . . . ngan kun ako mamatay, upayda na la nga mamay-ada kamo panapton ngan hi nanay! Diri unta ako sugad kamatay. Gabay ko kinawat!
An magurang waray na pagyakan; binmugtong han iya pisi. Katima mamulong, nagpapanhayhayon:
—Iton akon la nababarak’an nga kasinahan ka ni inay kun habaro.
—Kay hunahuna mo masisina?— nagpakiana an manghod, dapit hinkulbaan. —Sidnga nga ginlamba na ako hin damo, ipakikita ko inin akon mga labod ngan hinin akon hupaw nga luho; waray pa gud ako pakakapot hin kuwarta kundi amo la adton usa nga dako nga ihinatag ha akon hadton pasko, nga kinuha didi ha akon han padi kakulop. Waray pa ako pakakita hin kuwarta nga sugad hadto kamakaruruyag. Diri matuod hi nanay, diri gud matuod!
—Kun an padi in magsumat? . . .
Hi Crispin nagtikang pagtangis ngan mamulong, sakot han bikho:
