—Kun amo ito, ta, uli na la ikaw, diri ako mauli; sidnga na 1la hi nanay nga masakit ako; diri ko karuyag umuli.
—Ayaw pagtuok, Crispin! — nagsiring an magurang. —Diri matuod hi inay, ayaw pagtuok; hi Tasyo nasiring nga may andam ha aton nga maupay nga panihapon....
Hi Crispin hinmangad ngan magkinita kan iya mano.
—Maupay nga panihapon! Ako, waray pa ako paniudto; diri nira karuyag tagan ako hin pagkaon ngada han paghiulpot hiton duha nga onsita . . . Kundi, kun tumuod hi nanay? Sidnga la nga iton sakristan mayor nagbibinuwa ngan iton padi, kay natuod ha iya, amo man; hira ngatanan nagbibinuwa: nasiring nga kita mga kawatan kay an aton amay may bisyo nga . . .
Kundi may usa nga ulo nga hinmangaw dida han hagdanan ngada han siyahan nga igbaw, usa nga ulo nga, sugad kan Medusa,<5) nakapabagtik han mga pulong dida ha im-im han bata. Asya in usa nga ulo nga langkawag, magaslot, haglaba ngan maitom an buhok; may natungtong ha irong nga matagom nga salaming nga amo an nakakatago han kabutahan han luyo nga mata. Amo adto an sakristan mayor nga may batasan hin pag-ulpot, waray aringasa ngan waray pasabutsabot.
An duha nga magbugto baga in pinanlipakan.
—Ikaw, Basilio, magbabayad ka hin kahati nga multa tungod kay diri kinumpasan an imo katuktok!— nagsi ring an tingog daw tikang ha lungib, baga sugad hin nabugtuan hin ugat ha liog. —Ngan ikaw, Crispin, bilin ka niyan nga gab-i ngada han pagbaydi mo han imo kinawat.
Hi Crispin naniplat ngadto han iya magurang sugad hin nakikitabag.
— Tinugutan na kami. . . pamumulaton kami ni inay tikang ha ikawalo an takna — nagpakatakos pamulong hi Basilio.
—Ikaw di ka liwat makakauli ha ikawalo tubtob ka ha ikanapulo nga takna.
—Kundi, Senyor, ha ikasiyam diri na mahihimo paglakat, ngan iton amon balay harayo.
—Ikaw ngayan ha akon in maglalarang? — nagpakiana an tawo duro an kangaralson. Ngan kaptan hi Crispin dida ha butkon, hinagyo hin pag-ipagdaranas.
—Senyor, may usa na kasimana nga waray kami ig-
