Damaso ngahaw in maaram magwali; baga in komedyante! Asya ito!
—Kundi diri ta hinsasabutan! — nagngurudo hi Juana
—Tungod kay halarom!. . . Basta magwali hin maupay! Dida hini inmabot hi Sisa nga may tinukdo nga lidong; naghatag hin maupay nga aga han kababayin’an ngan sumaka han hagdanan.
—Sinmaka adto, saka man kita! — pulong nira.
Hi Sisa naabat nga duro an putok han iya kasingkasing dida han nagtitisaka hiya han hagdanan; waray hiya sasabot kun ano an iya pagyayakanon ha Padi nga basi diri mag-isog, ngan kun uunanhon niya hin pangatadungan mahatungod han iya anak. Hadto nga aga pagbasibas gud la, napasingadto hiya han iya sakob panguha han magupay nga utanon ngan iya ibutang dida han lidong, hinanigan niya hin dahon hin saging ngan hin mga bukad. Napakadto hiya ha ligid han salog pamliing hin pako kay ma aram hiya nga ayon han padi nga kinirabuan. Nagsul-ot hiya han iya gimauupayi nga dugnit ngan itukdo niya an lidong, waray la niya pagsangpita an iya anak, ngan tumugbong ha bungto.
Talinguha in diri pakaaringasa, naghinayhinay hiya pagsaka, namamati hiya kun daw may tingog nga iya hibatian nga kilala, nga huboy pa ug batan’on.
Kundi waray niya hinbabatian ngan waray niya iginkita, salit nagpadayon hiya ngadto ha kusina.
Didto nagpaniplaton hiya ha ngatanan nga kapiliwan: an mga suruguon ngan mga tanod waray la ha iya panginginano. Naghatag hiya hin katalahuran, sakuri hiya nga binaton.
—Diin ko ibubutang inin mga utanon ? —nagpakiana waray la hiya pagtagad.
—Dida . . . bisan diin!— binmaton an parapanluto waray ngani siplat kay nalilibang han iya buhat: nag-iinihaw hin usa nga kapon.
Ginhapid ngan ginturupad ni Sisa ha bawbaw han lamisa an mga tarong, mariguso, patula, sarusalida ngan han mga udlot hin pako. Katima, ibawbaw an mga bukad ngan hapahiyom, ngan pumakiana ha usa nga suruguon nga mauruupay in kaburut'on kay han parapanluto:
—Makahimo ako pakighimangraw han padi?
—Masakit,— binmaton hin gutiay la nga tingog.
