—Hi Crispin? Maaram ka kun aadto ha sakristiya?
An suruguon nahapahungat.
—Hi Crispin?— nagpakiana, nagkukuriot. —Waray didto ha iyo balay ? Ano, buot ka magdiwara? —Hi Basilio aadto ha balay, kundi hi Crispin pinmabilin dinhi, — ngani Sisa; —-karuyag ko igkita . . .
—Oo! — nagsiring an suruguon; — pinmabilin dinhi kundi unina . . .pagkaunina kumalagiw, nangawat anay hin damo nga butang. Agaaga pa kanina suguon ako han padi pagpakadto ha kuwartel pagpasabot han Guardia Civil. Tingali kun nagpakathon na hani ha iyo balay pagbiling han kabataan.
Hi Sisa nanarop han talinga ngan magnganga, kundi an iya mga im-im nagkikiniwakiwa la waray pakakaluwas hin bisan ano nga pulong.
—Pastilan ito nga imo mga anak! — sinmagbang an parapanluto. —Sinasabot gud nga maupay ka nga asawa: iton imo mga anak nasupo han amay! Ngan iton gutiay malabaw pa ngani!
Hi Sisa nagtikang pagtinangis hin magpait nga luha ngan nahapalingkod na la dida hin usa nga bangko.
—Ayaw dinhi pag-inuwang! — ginuliatan han parapanluto : —diri ka nasabot nga masakit an padi? Didto ha tuna pag-uraw!
Linmusad an makaluluoy nga babayi nga baros igintitikwang dida ha hagdanan dungan han namamaghigawhigaw nga mga hermanas mahatungod han sakit han padi.
Tinahuban hin alumpay han waray palad nga iroy, an iya nawong, ngan pigungan an iya pagtangis.
Han pag-abot niya ha tuna naniplat hiya anay, baga nag-alang, katima, sugad hin may ada niya hinturunan, pumaharayo hin dagmit.
