143
— Pastilan, kaluuyi gad ako niyo! — haros lumuhod pakimaluoy. — Usa ako nga makaluluoy, waray ko bulawan ug mga hiyas nga ihahatag ha iyo; an amo la nga akon natitipig iyo na kinuha, ito nga ugang nga akon unta gin-iipagbaraligya ... Dad’a niyo an iyo hiagian dinhi ha payag, kundi ayaw gad ako niyo pagdad’a, tuguti gad ako niyo nga dinhi na la ako kamatay!
— Sulong! kinahanglan umupod ka; kun diri ka umupod hin imo kaburut’on amon ka hihigtan.
Hi Sisa nagtikang pagtinangis hin magpait nga luha.
— Kun diri man, papag-unha ako niyo hin antaw! — nakimaluoy han pag-abat nga kinaptan hiya ngan igduso.
An duha nga sundalo nanhikaluoy ngan nagsabot anay hin huringhuring.
—Oo! — nagsiring in usa;—kundi tungod kay tikang dinhi ngadto ha bungto pagsulod makakadalagan ka, amon ka anay pagbubutngaon. Paghisulod ta ha bungto makakaguna ka hin kanan karuhaan kapitad, kundi pagbantay la! Diri ka sumulod hin bisan diin nga tindahan ngan diri magukuy-ukoy. Hala, dagmit!
Kawang la an pakimaluoy, kawang la an pangatadungan, karag la an mga iginsaad. Nasiring an mga sundalo nga maaamong na hira ngan dako na adto nga kaluoy nira ha tya.
Han pakakita na nga ginbubutnga hiya han duduha haros na la hiya mamatay hin kaalo. Waray gad man gud nira iginhihisugat ha dalan, kundi an hangin ngan an kapawa han adlaw? An matuod nga kaalo naabat hin mata bisan diin. Tinmabon hiya han bayhon han iya alumpay ngan maglinakat diri nagkikita han ginlalaktan ngan magtinangis hin mamigaw han iya kasugad. Maaram hiya nga hiya kablas, sayod hiya nga tinatalikdan hiya han ngatanan pati han iya bana, kundi ngada yana nakakahunahuna la hiya gihapon nga maupay an iya dungog ngan gin-aalngan hiya: ngada yana nahakakaluoy hiya pagkita hiton kababayin’an nga maglaw-ay mamanapton ngan tinatawag han kadam’an nga aruasawa han kasundaluhan. Yana baga sugad hin inmubos pa ngani hiya hadto nga kababayin’an hin usa nga balitang dida han hagdan han kinabuhi.
Nabati niya in tinuganob hin kakabayuhan: amo an mga magdadara hin isda ngadto ha mga sulod nga bungto, Batasan nira in pagburunyog, mga pipira nga kababayin’an
