145
An iya pamulong diri haros matukib; usa nga sumbong, usa nga saway, panginyupo, usa nga pangamaya, an kasakit nga natim-os ha usa nga pamulong.
An mga sundalo nga nanhikaluoy binmaton ha iya hin usa nga tangdo. Hi Sisa nag-una dayon ngan tinuyo niya in pagpakawaray kaalantad.
Hadto ‘ngahaw naghihinbagting an mga lingganay pagpasabot nga kahuhuman pa la han misa mayor. Dinarudagmit ni Sisa an pitad nga diri hiya unta igkita han mga tawo nga nagkakaguwa. Kundi, kawang la! waray linilikyan nga diri hiya ighisugat.
Nakigkatatawa hiya hin mapait nga hiyom hin duha hadto nga babayi ha atubangan han kadam’an. Ipinapakiana han ira mga mata, ngan ngadto ha unhan, basi diri na hiya igkasugat hin sugad kamakatutunaw nga alo itinamod niya an jya ulo ngan ngadto na la hiya ha tuna pagkikinita, kundi, urusahon! pinanhihipakdulan niya an mga bato dida ha dalan.
An mga tawo nangungukoy anay tigdali han pagpapakakita ha iya, naggigisirusiplat: ini ngatanan inaabat niya, sinasabot niya bisan kun iya igintitinamod la an iya mga mata.
Nadungog ntya in usa nga waray haros nga tingog hin babayi nga nagpipinakiana dida ha iya luyo hin dako nga tingog:
— Diin niyo hidakpi? An salapi?
Asya in usa nga babayi nga waray tapis, madarag ngan malunghaw an saya ngan an bado kamray nga matagom: kinikilala dida han iya pamanapton nga babayi han kasundaluhan.
Baga sugad hiya hin tinampalo ha nawong: ginhubuan hiya hadto nga babayi ha atubangan han kadam’an. Iginangad niya nadaliay an iya mata basi may hitunghan han mga badyangas ug mga pagtamay; kinita niya nga an mga tawo harayo kaupay ha iya, kundi naabat hiya han ira mahagkot nga siplat ngan iya binabati an ira higawhigaw. An makaluluoy nga babayi naglilinakat waray babati han tuna nga iya ginlalaktan.
— Oy, ngadi! — ginuliatan han usa nga sundalo.
Sugad hin uyagan, waray balatian nga narurub’an la dayon han makina, binmirik hiya hin dagmit. Ngan waray na niya ginpapanhunahunaan, waray na ginkikita nga bisan ano, dinmalagan pagtago; nakita niya in usa nga purtahan
