150
—Buwas han aga, diri pa magpapawa, matutuman an imo karuyag. Yana nga gab-i aandamon ko ngatanan basi waray makulang.
—Kun amo, magsusurat na la ako ngadto hiton akon kasangkayan basi magpakanhi. Talinguhaa nga diri makaupod iton padi.
—Kay ano?
—Kay baga ako in ginbabantayan. Nangingirhat ako hiton iya mga mata nga nanlulunod ngan makaharadlok: isinisiplat ngani ha akon nahahadlok ako. Kun nakikihimangraw ha akon, iton tingog... ngan ginhihimangrawan ako hin diri ko sinasabot nga mga butang, mga surupaton... ginpakianhan ako kun nag-inop na ba ako mahatungod hin mga surat ni adton nanay; baga dapit tuyaw. Hi sangkay Sinang ngan hi ugto Andeng nasiring nga may ada kuno gutiay nga kalipungan, tungod kay diri nakaon, diri nakarigo ngan kanunay aadto uukoy ha kasisidman. Talinguhaa nga diri makaupod!
—Diri mahihimo nga diri ta abiabihon, -binmaton hi Ibarra, nagpipinamurubuot.- Asya dinhi an kabatasanan; iini yana ha iyo ngan labot pa nakikigmaupay ha akon. Han pagpakianhi han Alkalde mahatungod han pinanunuyo ko nga akon na iginsumat ha imo, nagdinayaw pa ngani ha akon ngan waray gud rumiwa bisan magutiay. Kundi inaabat ko nga nabuot ka; ayaw kabaraka kay diri ta igkakasakay ha baluto.
Binati in maglaksi nga pitad: asya an padi nga nagti- tidaop ha ira nga may dara nga pinirit nga tawa ha iya mga im-im.
—Mahagkot inin hangin!- nagsiring;- kun nakakadukot inin sip-on diri nabulag tubtob ngada han pagbabalik liwat han sirak. Diri kamo nahirot nga panip-unon kamo?
Nangungurog an iya tingog ngan an iya paniplat tipakadto ha hirayo; diri ngada han duduha nga batan'on.
—Maupay ngani lugod namon pamation inin gab-i ngan mahalayahay inin harupoy! - binmaton hi Ibarra. Ini nga mga bulan iginhihituman han kamasirak ngan kamahalayahay; nagkakahuglog in tigpira nga dahon kundi nangungudlot in mga bukad.
Hi P. Salvi nanhayhay.
—Naayon ako han pagkatampo hini nga duha nga panahon nga diri iniirugan han kamahagkot,(2) nagpa-dayon hi Ibarra. - Ha bulan ha Febrero nananaringsing
