an kakahuyan nga bumurunga ngan ha bulan ha Marzo
mamamay-ada na kita hinog nga mga bunga. Pag-abot
han mga bulan han sirak mapakadto kami ha Iain nga nayon.
Hi P. Salvi nahapahiyom. Nagtikang hira paghimangraw mahatungod hin damo la nga hinnanabihan, mahatungod han panahon, han bungto, han patron; hi Maria Clara namiling hin hinpasangilan ngan pumaharayo.
— Kay nahananabi man kita han mga panagtawo, tuguti ako nga mag-abiabi ha imo ngadto hiton kalipayan buwas. Usa nga pangaon ha gawas nga amon iginsisipaghatag ha amon la ngahaw, kami ngan han amon kasangkayan.
— Diin man dapit?
— An kadaragan’an karuyag nga dida hiton salog nga natikang dida hiton haraniay nga kagurangan, dida ha may dalakit; salit kinahanglan nga umagaaga kita basi diri kita pasuan.
An padi nagpamurubuot; katima nagsiring:
— Iton imo abiabi nakakaaghat salit akon kakarawaton pagpakita ko ha imo nga diri ako madumot. Kundi mauurhi ako kay tutumanon ko anay an akon mga katungdanan ha singbahan. Malipay ka kay waray ha imo nakakasagaki nga ano man!
Waray kaiha tikang hadto manamilit hi Ibarra tungod han pag-andam han mga arandamon han kabuwas nga kalipay. Masirumsirom na an gab-i.
Didto ha tuna hinaranian hiya hin usa nga naghatag ha iya hin katalahuran.
— Hino ka? — ginpakianhan ni Ibarra.
—Diri ka makilala, senyor, han akon ngaran, —binmaton an diri kinikilala. —May duha na kaadlaw nga akon ka ginhihinulat.
— Kay hiunong hin ano?
— Kay waray ha akon naluluoy bisan diin, kay nasising nga usa kuno ako nga tulisan, senyor. Kundi nawad’an ako han akon mga anak an asawa ko tuyaw ngan ngatanan nasiring nga hayukat pa ha akon! Pinanginano ni Ibarra hin madagmit an tawo ngan magpakiana:
— Ano man imo karuyag yana?
Nangangaro ako han bisan ano nga imo ikaluoy ha akon asawa ngan ha akon mga anak!
