Han pag-abot nira ha baybayon nabati in gugliat hin kalipay ngan panhipausa dida ha mga im-im han kababayin'an. Nagpakakita hira hin duduha nga baluto nga ginrangkit ngan ginsabngan hin maupay hin mga bukad ug mga dahon ngan pinapanmutulan hin dugnit nga magkalainlain an tina; ha tungod han sinalgan nga bahin pinanmitayan hin mga parol nga papel ngan hin mga bukad sakot han mga rosas, klabel, ngan mga prutas, sugad han pinya, kasoy, saging, mayabas, bubuwa ug iba pa. Gindara ni Ibarra ngadto an iya mga alkumbra ngan mga biray ha balay ngan say niya pinanhimo nga mga lingkuran han kababayin'an. An mga tukon(1) ug mga gayong mga sinabngan man gihapon. Didto han baluto nga mauruupay in sabong may ada harpa, mga sista, may kordiyon ngan hin usa nga huruypon nga sungay hin karabaw; didto man han usa naglalaga an kalayo ha mga kalan; naglalaso hin siminte, kapi ngan hin luya nga papainiton.(2)
—Dinhi an kababayin'an, didto an kalalakin'an! —nagsiring an mga iroy han pagpakasakay. -Ayaw kamo hin kiwa! Ayaw kamo hin kiwa nga uraura bangin kita malunod.
—Pangudos kamo anay! - sinmagdon hi Dada Isabel, ngan nangudos.
—Hi kami la dinhi? nagpakiana hi Sinang nga nag-mumurusot —Hi kami gud la . . .? Agii!(3)
Ini nga "agi" gumikan ha usa nga kutol nga ipinahat ha iya ni iya mama.
An mga baluto nagtitiantaw hin hinayhinay dida ha baybayon nga an mga suga nannganganinaw dida han maliaway nga tubig han danaw nga malinaw nga gayod. Ha Sidlangan nagtitikang na pagbunias an adlaw. Nagmingaw hin uraura; an mga batan'on, tungod han paglainlain ha ira han mga kag-anak, baga say tinuron an pag-isip.
—Tagam baya! - nagsiring hin dako nga tingog hi Albino, an nag-iipagparadi, ha iya igkasi batan'on; —tamaki hin maupay iton buli ha tungod hiton imo tiil.
—Tungod kay ano?
—Kay bangin ibuswak, masulod an tubig; ini nga baluto damo in kaluhuan.
—Hiyay, malulunod kita! - naggugliat an kababayin'an ngan nagkahahadlok.
