— Ayaw kamo kahadlok, mga ginang! — ginpatapod hira han tipagparadi. — Tapuran ito nga baluto; lilima la in kaluhuan nga diri dagko kaupay.
— Lilima nga kaluhuan! Hesus! buot kami niyo paglumsan? — nagsiring an kababayin’an, duro na an pagkahahadlok.
— Lilima la, mga ginang, ngan tigsugad la hini kadagko! — nagpipinatapod an tipagparadi ipinakikita ha ira an ginkakalidungan han iya tamuragko ngan han talintuturo. — Tamaki la niyo hin maupay an buli nga diri ibuswak.
— Ginoo ko! Maria Santisima! nasulod na an tubig! —ginmuliat in usa nga lagas nga babayi nga inmabat nga naghuhulos na.
Nagmasamok hin gutiay; may naggugugliat, may karuyag na la umambak ha tubig. — Tamaki niyo dida hin maupay an buli! — asya la in naluluwas han tipagparadi nagtitinudlok ngadto dapit han kadaragan’an.
— Diin, diin? Ginoo! diri kami maaram! pastilan kadia gad kami, diri kami maaram kun hain! — naghinpakimaluoy an nagkakahahadlok nga kababayin’an.
Nagkinahanglan gud nga in lima nga ulitawo bumalhin ngadto han usa nga baluto pagpahilom han nagkakalilisang nga mga iroy. Ngan nagkairigo la! Baga sugad hin ha tu ngod han tagsa nga daraga may ada kahihirutan: ha tungod lugod han katigurangan waray gud mausa nga kaluhuan nga taramakan. Ngan usa pa nga labi hin kapaghiigo la! Hi Ibarra didto hipalingkod ha sapit ni Maria Clara, hi Albino ha sapit ni Victoria ug iba pa. An kamingaw binmalik ngadto han alirong han mga iroy, kundi waray didto han mga kabataan pa.
Tungod kay malinaway an tubig ngan an mga bunuan diri harayo ngan maagahon pa kaupay, ginkauruyunan nga panmayaan anay an mga bugsay ngan manmainit an tawo ngatanan. Pinamarong an mga suga kay an kapawa nalambrag na han walog.
— Waray sugad han linaso nga luya ha aga ugsa mapakadto ha singbahan! — nasiring hi Kapitana Tika, an iroy han matawa nga Sinang; — painit kamo hin puto(4) ngan hin linaso nga luya, Albino, ngan masabot kamo nga aalpan kamo hin dako nga karuyag pangadi.
