— Asya na inin akon binubuhat, — binmaton ini; — naghuhunahuna ako pagkumpisal.
— Ayaw! — nasiring hi Sinang, — kapi in inma kay nakakahatag hin kalipay.
— Yana ngahaw mainom ako kay baga inaalpan akohin kasamdon.
— Ayaw asa hito! — sinmagdon hi Dada Isabel; — siminte in inma ngan kumaon hin supas; nasiring nga an siminte nakakapahadong han panhunahuna.
— Mainom liwat ako hin siminte ngan makaon hin supas! — nabaton la an masinugtanon nga tipagparadi;—iginkapalad nga ini nga mga irinmon diri asya an tuluuhan nga katoliko.
— Kundi makakahimo ka?. . . . . — nagpakiana hi Victoria.
— Pag-inom liwat hin sikulate? Kaiya daw la! Basta diri na mag-iha an pamahaw.
An kaagahon makaruruyag: an mga tubig nagtitikang na paggimlat ug dida han silaw nga tikang ha langit ngan dida han nasulhog nga tikang ha tubig inaabat in kapawa nga nakakalambrag han ngatanan nga butang, usa nga kalambrag nga waray dara nga lambong, maranggat ngan mahalayahay, puno hin mga tina nga pinakakasiring ta nga gumikan ha kadagatan.
Haros ngatanan malipay, ngatanan nagpapakasimhot han harupoy nga nagtitikang na pagmata; pati an mga iroy, nga puno hin mga kahihirutan ug mga kataragman, nangingirog na han katatawa ug mga tiawtiaw.
— Nahanunumdom ka? — nasiring in usa ha ira kan Kapitana Tika, — nahanunumdom ka pa kun nangangarigos kita didto ha salog han kadaragan’an pa kita? Danay usahay nanhihianod, napaayon la han sulog, in magpakalainlain nga mga karan’on, mga prutas nga sakot hin bukad nga maghamot, nga nanhihiluran hin mga upak hin saging. Tagsa nga upak may ada dara nga bandera nga sinuratan han aton mga ngaran ....
—Ngan kun nangunguli na kita? — ngani hin usa liwat nga waray na paghulat nga makatapos an nagyayakan; —pinanhihiabutan ta nga mga guba na an mga tulay nga kawayan, salit namamag-ubog na la kita han sapa . . . hin kamagsuri!
— Oo! — nasumpay hi Kapitan Tika; — kundi ginagapilan ko an paghulos han sidsid han akon saya diri la hi-
