kit’an an akon bitiis:(5)maaram ako nga dida han kakayawan
ha piliw may mga mata nga namamagkinita.
An mga batan’on nga nagpapakabati hini naggigipakirukiro ngan nanhihipahiyom; an iba nanhihimalanga la han ira karukayakan ngan diri namamag-asa.
Uusa la katawo, an nag-uulin, an waray pagtitingol ngan waray iirog hadto nga kalipay. Asya hiya in usa nga batan’on nga buksol ngan an iya nawong makaaraghat hin panhunahuna tungod han dagko ug magsamdong nga mga mata ngan han dapit kanan maisog nga lirik han mga im-im. An buhok nga itom ngan haglaba ug waray surusudlay nanununton ngadto ha iya lison nga liog, dida han mga kunot han iya bado nga bahol ngan tinumong inaabat an iya mabakod nga kalawas nga sinasarigan han iya mabaskog nga butkon ngan pinakakasugad la hin usa nga dagang an pagdara niya han usa nga bugsay nga dako nga asya an iya ginagamit pag-ulin han duduha nga baluto.
Nakadamo na hikit’i ni Maria Clara nga nagkikinita ha iya kundi han paghihiabati niya tumigda hin pagsiplat ngadto ha iba, ngadto ha hirayo, ngadto han kasidsiran nga namamarapara. Nahangaluoy an daraga hadto nga iya pagusaan, salit pinmurot hin usa nga biskutso ngan iya tagan. An nag-uulin nagkinita anay ha iya hin paghipausa, kundi usa la kadala; kinmarawat hin usa nga galyeta ngan magpasalamat hin usa nga tingog nga an tuman la nga hinbatian.
Ngan waray na may nahanumdom ha iya. An maglipayon nga katatawa ngan han mga magsuri nga pulong han mga batan’on waray ha iya pakakabantad; waray ha iya pakakapatawa an malipayon nga Sinang nga danay kun usa magkuriot dara han kuribot nga talagsa makarawat, kundi nabalik liwat, diri naiiha, hin pagtinawa.
Katima han pamainit magsakay hira tikadto han mga bunuan.(6)
Duduha an bunuan, nag-aantaw, ngaduha kan Kapitan Tiyago. Tikang ha hirayo nakikita in mga talabong nga nanhahapon ha katapusan han mga kawayan namamagtinamod, baman an mga kanaway namamaglupadlupad la, nagsusulat-sugat, nagpapasarusaghid han ira pako dida ha tubig ngan namamaghinuni hin maaringasa.
Say ginkikinita ni Maria Clara an mga talabong nga namagkalupad tipakadto han harani nga bukid han pagtiduok han mga baluto.
